Şymkenttegı Özbekälı Jänıbekov atyndaǧy Oŋtüstık Qazaqstan pedagogikalyq universitetınıŋ delegasiiasy Türkiia Respublikasyna arnaiy ıssaparmen bardy. Sapardyŋ negızgı maqsaty – biyl alǧaşqy talapkerlerın qabyldaǧan Gazi universitetı filialynyŋ jūmysyn jandandyru jäne ǧylymi-bılım beru baǧytyndaǧy yntymaqtastyqty keŋeitu.
Qazaqstandyq delegasiiany universitettıŋ Basqarma töraǧasy – Rektory Qairat Balabiev bastap bardy. Qūramda rektor keŋesşısı Mūqaş Eskendırov pen Ǧylymi jūmystar jäne innovasiialar jönındegı prorektor Erjan Kerımbekov boldy.
Issapar barysynda delegasiia Gazi universitetınıŋ rektory, professor Ugur Unalmen kezdestı. Kezdesude ekı joǧary oqu orny arasyndaǧy serıktestıktı odan ärı damytu mäselelerı talqylandy.
Taraptar Gazi universitetı filialynyŋ qyzmetın halyqaralyq akademiialyq bılım beru standarttaryna säikestendıru mäselesıne toqtaldy. Sonymen qatar ǧylymi-zertteu baǧytyndaǧy bırlesken jūmystardy küşeituge basymdyq berıldı.
Kezdesu qorytyndysynda ortaq ǧylymi jobalardy äzırleu jäne jüzege asyru, professor-oqytuşylar qūramyn zertteu jūmystaryna tartu jönınde kelısımder jasaldy. Sondai-aq doktorantura baǧytyndaǧy akademiialyq bailanystardy damytu mäselesı qarastyryldy.
Issapar aiasynda qazaqstandyq delegasiia Gazi, Ankara jäne Taiau Şyǧys tehnikalyq universitetterınıŋ bırlesken ǧylymi-zertteu ortalyǧy – NÖROM qyzmetımen tanysty. Ortalyq neiroǧylym jäne neirotehnologiia salalarynda ırgelı ärı qoldanbaly zertteuler jürgızuge baǧyttalǧan.
Delegasiia ortalyqtyŋ qūrylymy men basqaru jüiesın zerdeledı. Sonymen qatar ǧylymi zerthanalardyŋ jūmysy, zertteu jobalaryn ūiymdastyru tetıkterı jäne universitetter arasyndaǧy ǧylymi kooperasiia täjıribesımen tanysty.
Türkiialyq ärıptesterdıŋ täjıribesı Özbekälı Jänıbekov atyndaǧy OQPU bazasynda zamanaui ǧylymi-zertteu habyn qūru ideiasyn jüzege asyruǧa negız bolmaq. Mūndai ortalyq universitetter men ǧylymi ūiymdardyŋ ǧylymi äleuetın bırıktıruge mümkındık beredı.
Sapar barysynda bırlesken zerthanalar qūru, halyqaralyq ǧylymi jobalarǧa qatysu, doktoranttardy daiarlau jäne jas ǧalymdardyŋ zertteu äleuetın arttyru mäselelerı de talqylandy.
Taraptar bılım beru salasyndaǧy serıktestıktı ǧylymi-zertteu baǧyttarymen ūştastyruǧa niettı. Aldaǧy uaqytta halyqaralyq deŋgeidegı bırlesken jobalardy jüzege asyru jäne ekı el ǧalymdarynyŋ bailanysyn nyǧaitu baǧytyndaǧy jūmystar jalǧaspaq.
