Bügın, 24 tamyzda Qazaqstan Prezidentı Qasym-Jomart Toqaev Aqordada halyqaralyq pän olimpiadalarynda jeŋımpaz atanyp, jüldelı oryndarǧa ie bolǧan oquşylarmen jäne studenttermen kezdestı, dep habarlaidy "Adyrna".
Saltanatty ıs-şaraǧa fizika, himiia, biologiia, matematika, informatika, geografiia jäne lingvistika pänderı boiynşa bedeldı bılım dodalarynda top jarǧan 21 laureat, sondai-aq olardyŋ ūstazdary men tälımgerlerı qatysty. Daryndy jastardyŋ altauy altyn, on bırı kümıs, törteuı qola medal ielengen.
Memleket basşysy halyqaralyq bılım saiystarynda üzdık nätije körsetken jastardy jeŋısımen qūttyqtap, olardyŋ el abyroiyn asqaqtatuǧa qosqan ülesın joǧary baǧalady.
"Ärqaisyŋyz älemnıŋ eŋ ziiatker oquşylarymen bäsekege tüsıp, bedeldı bılım dodalarynda top jardyŋyzdar. Kök Tuymyzdy biıkke köterıp, elımızdıŋ abyroi-bedelın arttyruǧa mol üles qosyp jürsızder. Bız sızderdı maqtan tūtamyz. Qazaqstannyŋ jarqyn bolaşaǧy – oiy ūşqyr, bılımdı, daryndy jastardyŋ qolynda. Sızder el maqtanyşy degen atqa laiyqsyzdar"! – dedı Qasym-Jomart Toqaev.
Prezident är medaldyŋ artynda ūzaq daiyndyq, üzdıksız ızdenıs pen tabandy eŋbek tūrǧanyn atap öttı. Osy oraida Memleket basşysy Abaidyŋ "Üş-aq närse adamnyŋ qasietı: ystyq qairat, nūrly aqyl, jyly jürek" degen ösietın mysalǧa keltırdı.
Qasym-Jomart Toqaev daryndy jastardyŋ bolaşaqta bılıktı injener, körnektı ǧalym jäne myqty maman atanyp, jaŋa tehnologiialar men ǧylymi jaŋalyqtar arqyly Qazaqstannyŋ örkendeuıne jäne älemnıŋ damuyna üles qosatynyna senım bıldırdı.
