Qazaqstan qoǧamynda tarihi ädılettılık mäselesı jiı talqylanady. Alaida ötkennıŋ qasıretterıne ünemı nazar audaryp, soǧan bailanyp qalu eldıŋ damuyna kedergı keltıruı mümkın. Mäjılıstıŋ būrynǧy deputaty Ermūrat Bäpidıŋ aituynşa, memlekettıŋ alǧa jyljuy üşın eŋ aldymen ūlttyŋ boiynda quat, ruh küşı jäne bolaşaqqa degen senım boluy qajet.
«Bızde osy zamanmen qatar jüruge jetkılıktı küş-quat boluy kerek. Jas ūrpaqtyŋ boiynda ışkı quat boluy tiıs. Eger bız ünemı ötkenge qarap, tek ötkendı aityp, körgen qasıretımızdı eske alyp, sätsızdıkterımızge kınälılerdı üzdıksız ızdei bersek, onda tek jylap-syqtaityn halyqtyŋ psihologiiasyna tüsıp ketuımız mümkın», – deidı deputat.
Ermūrat Bäpi būl oiyn Prezidenttıŋ Qyzylordada ötken Ūlttyq qūryltai otyrysynda aitqan «tarihi jaraqattan qalyptasqan ūlttyq psihologiiadan arylu qajet» degen sözımen bailanystyrady.
Onyŋ aituynşa, osy tūrǧyda eŋ aldymen jazuşylar men ädebiet ökılderınıŋ rölı erekşe. Olar şyǧarmalarynda ötkennıŋ sarqynşaqtary men auyl ömırı turaly ǧana jazudy doǧaryp, jastardy jasampazdyqqa, bılım aluǧa, ülken maqsat qoiuǧa, jüregı men ısınde adal boluǧa jıgerlendıretın zamanaui qalalyq roman janryndaǧy tuyndylarǧa köbırek den qoiuy qajet.
Bäpidıŋ sözınşe, qoǧamnyŋ barlyq küşı men ūmtylysy ötkenge ökınış bıldıruge emes, bolaşaqtyŋ mümkındıkterıne baǧyttaluy tiıs.
«Barlyq qiyndyqtyŋ sebebın özgeden köru, bärın halyq basynan ötkergen qasırettermen tüsındıru jäne kınälılerdı ızdeu eşqandai nätije bermeidı. Menıŋşe, Prezident jetkızgısı kelgen negızgı oi – osy», – deidı ol.
Deputat sondai-aq älemdık täjıribege nazar audarady. Onyŋ pıkırınşe, köptegen memleketter öz tarihynda auyr kezeŋderdı bastan ötkergenımen, keiın bolaşaqqa baǧyttalǧan damu jolyn taŋdady.
Mysal retınde ol Ekınşı düniejüzılık soǧystan keiıngı Germaniiany keltıredı. Būl el faşistık ideologiiadan bas tartyp, qoǧamnyŋ sanasyn özgerttı. Japoniia atom bombalarynyŋ zardabyn körgenıne qaramastan, keiın älemdegı jetekşı tehnologiialyq jäne ekonomikalyq derjavalardyŋ bırıne ainalyp, AQŞ-pen tyǧyz yntymaqtastyq ornatty. Al Oŋtüstık Koreia da joiqyn soǧystan keiın qysqa uaqyt ışınde eŋ damyǧan memleketterdıŋ qataryna qosyldy.
«Bızdıŋ bolaşaqqa degen ūmtylysymyz ötkennıŋ qasıretıne degen bailanysymyzdan äldeqaida küştı boluy kerek», – deidı Ermūrat Bäpi.
Deputat būl qūbylysty «balalyq şaqtaǧy psihologiialyq jaraqat» ūǧymymen de salystyrady. Onyŋ aituynşa, eger adam ömır boiy tek sol jaraqatpen ömır sürse, tolyqqandy dami almaidy jäne köbıne sätsız adam bolyp qalady. Sol siiaqty ūlt ta özın qūrban retınde qabyldau psihologiiasynan arylyp, tarihi täjıribeden sabaq alyp, progressivtı, quatty ärı örkendegen memleket qūru jolynda alǧa jyljuy tiıs.
