Auyl balalary halyqaralyq arenada Qazaqstan namysyn taǧy da abyroimen qorǧady. Timur Qūlybaevtyŋ Halyk qaiyrymdylyq qory jüzege asyryp kele jatqan Auyl Sport jobasynyŋ jeŋımpazdary Qyrǧyzstanda ötken ekı bırdei halyqaralyq turnirde qola jüldege ie boldy.
Qostanai oblysy Äulieköl auylynyŋ qyzdar basketbol komandasy Ystyqköl jaǧalauynda ötken II Halyqaralyq Ūlttar kubogynda üzdık üştıkke endı. 20-27 mausym aralyǧynda Tamǧa auylynda ūiymdastyrylǧan dodaǧa Qazaqstan, Qyrǧyzstan, Täjıkstan, Özbekstan jäne Reseiden kelgen 10-nan astam komanda qatysty. Osyndai myqty qarsylastar arasynda Äulieköl qyzdary qaisar mınez körsetıp, qola jülde jeŋıp aldy.
Al Jetısu oblysy Panfilov audany Qoŋyröleŋ auylynyŋ 2010-2011 jyly tuǧan jasöspırımderı Şolpan-Ata qalasy, Bosterı selosynda ötken «Ūlttar dostastyǧy kubogı» halyqaralyq turnirınde üşınşı oryn ielendı. 21-26 mausym aralyǧynda ötken jarysqa Qazaqstan, Özbekstan jäne Qyrǧyzstannan 8 komanda qatysty. Qazaqstan atynan Basket Kids, Tamos Eagles jäne Auyl Sport komandalary synǧa tüstı.
Būl turnirde bırınşı oryndy Qazaqstannyŋ Tamos Eagles komandasy jeŋıp alsa, ekınşı oryn Qyrǧyzstannyŋ «Qalqan» komandasyna būiyrdy. Al Auyl Sport namysyn qorǧaǧan Qoŋyröleŋ jasöspırımderı qola jüldeger atandy. Komandanyŋ 10-nömırlı oiynşysy Mūqatai Nūrsūltan turnirdıŋ üzdık oiynşysy atanyp, MVP arnaiy syilyǧyn ielendı.
Qoŋyröleŋ komandasynyŋ jattyqtyruşysy Qabdolda Bekdos auyl balalarynyŋ käsıbi klubtarmen teŋ därejede oinaǧanyn erekşe atap öttı.
«Auyl Sport komandasynan basqa turnirge qatysuşylardyŋ barlyǧy basketbol klubtary men arnaiy daiarlaityn mektepterden kelgen qūramalar. Kışkentai auyldan şyqqan qazaq balalarynyŋ ülken arenada mūndai komandalarǧa tötep berıp, jüldelı oryn ielenuınıŋ özı auyl sportynyŋ äleuetı küştı ekenın däleldeidı», – dedı Qabdolda Bekdos.
Äulieköl qyzdarynyŋ jattyqtyruşysy İgor Serous ta halyqaralyq turnir auyl balalary üşın ülken täjıribe bolǧanyn jetkızdı.
«Qyzdarymyz būl turnirde naǧyz mınez körsettı. Är oiyn bız üşın ülken täjıribe boldy. Halyqaralyq deŋgeidegı komandalarmen kezdesıp, öz küşımızdı synadyq. Osyndai mümkındık bergen Timur Qūlybaevtyŋ Halyk qaiyrymdylyq qoryna erekşe alǧys aitamyz. Auyl balalary üşın mūndai qoldaudyŋ maŋyzy öte zor. Būl jeŋıs – tek bızdıŋ komandanyŋ emes, auyl sportyna senım artqan barşa azamattyŋ ortaq jeŋısı», – dedı jattyqtyruşy İgor Serous.
Jas sportşylardyŋ turnirge qatysuyna bailanysty jol jüru, tūru jäne tamaqtanu şyǧyndaryn Timur Qūlybaevtyŋ Halyk qaiyrymdylyq qory qamtamasyz ettı.
Halyk qorynyŋ atqaruşy direktory Ǧalymbek Jaqsylyqovtyŋ aituynşa, Auyl Sport jobasy auyl balalary üşın ülken mümkındık alaŋyna ainalyp otyr.
«Bızdıŋ joba – jai ǧana sporttyq bastama emes, būl – naǧyz äleumettık lift. Būl auyl balalary üşın jaŋa kökjiekke jol aşyp, özıne senuge jäne ülken jetıstıkterge alǧaşqy qadam jasauǧa berılgen mümkındık. Sol maqsatqa jetu üşın bız balalardyŋ turnirge qatysuyna qajet barlyq jaǧdaidy – jol jüru, tūru, tamaqtanu, sporttyq kiım jäne özge de ūiymdastyru şyǧyndaryn öz moinymyzǧa aldyq. Balalar eşteŋege alaŋdamai, bar nazaryn daiyndyqqa, oiynǧa jäne jeŋıske audaruy kerek. Osyndai bastamalar erteŋgı Qazaqstandy qūratyn jastardyŋ boiynda senım men mınez qalyptastyratynyn körıp otyrmyz», – dedı Ǧalymbek Jaqsylyqov.
Bügınde «Auyl Sport» jobasynyŋ jeŋımpazdary respublikalyq deŋgeimen şektelmei, şeteldık jarystarda da el abyroiyn asqaqtatyp jür. Serbiiada ötken ISF U-15 Gimnaziadasynda ūlttyq qūrama sapyndaǧy 22 sportşynyŋ 12-sı osy jobanyŋ jeŋımpazdary boldy. Auyldan şyqqan sportşylar bokstan üş altyn, erkın küresten bır altyn medal jeŋıp alyp, şahmattan halyqaralyq ūiymdastyruşylardyŋ ekı arnaiy jüldesıne ie boldy.
Sondai-aq, joba qatysuşylary Atyraudaǧy AiRomCup, Astanada ötken Kazakhstan Open jäne Qyrǧyzstandaǧy halyqaralyq voleibol turnirlerınde de baq synady. Kazakhstan Open dodasynda auyldan şyqqan ekı sportşy kümıs pen qola jülde alsa, Qyrǧyzstandaǧy halyqaralyq turnirde qazaqstandyq auyl voleibolşylary chempion atandy.
Al biylǧy Äulieköl qyzdary men Qoŋyröleŋ jasöspırımderınıŋ qola jüldesı – auyl sportyna jasalǧan senımnıŋ naqty nätijesı. Bügın olar qola aldy. Erteŋ sol auyl balalary Qazaqstannyŋ kök tuyn älemdık arenalarda jelbıretedı.
