Memleket basşysy Qasym-Jomart Toqaev Halyqaralyq balalardy qorǧau künımen qūttyqtady, dep habarlaidy «Adyrna» tılşısı.
«Halyqaralyq balalardy qorǧau künı qūtty bolsyn! Jas ūrpaqtyŋ qūqyǧyn qorǧau, densaulyǧyn saqtau jäne olardyŋ jan-jaqty damuyna qolaily jaǧdai jasau – jalpyūlttyq maqsat jäne konstitusiialyq mındet. Auyzbırşılıgı myqty, tatu-tättı otbasy – baqytty balalyq şaqtyŋ arqauy. Sondyqtan otbasy qūndylyqtaryn qorǧau jaŋa Konstitusiianyŋ asa maŋyzdy normasynyŋ bırı retınde aiqyndaldy. Öskeleŋ ūrpaqtyŋ jasampazdyq ruhy orasan zor. Olar bılım men sportta, önerde mol tabysqa jetude. Menıŋ bastamammen qolǧa alynǧan «Ūlttyq qor – balalarǧa» jobasy aiasynda memleket tarapynan ärbır balaǧa qamqorlyq jasalyp jatyr. Biyl «Qazaqstan balalary» tūjyrymdamasy ıske asyryla bastady. Jas buyndy qoldau ärdaiym elımızdıŋ, iaǧni Ädılettı jäne Ozyq Qazaqstannyŋ basty nazarynda bolady»,– dep jazdy prezident Instagram paraqşasynda.
Aita keteiık, balalardy qorǧau künınıŋ maqsaty – balalardyŋ ömır süruge, pıkır bostandyǧyna, bılım aluǧa jäne qorǧauǧa qūqyǧy bar ekenın eske salu. Būl mereke 1949 jyly qaraşada Äielderdıŋ halyqaralyq demokratiialyq federasiiasy kongresınıŋ şeşımımen bekıtıldı.
