Fransiia prezidentı Emmanuel Makronnyŋ resmi rezidensiiasynda tıntu jürgızıldı. Būl turaly Le Monde fransuz gazetı jazdy, dep habarlaidy “Adyrna”.
Basylym mälımetınşe, 21 mamyr künı Parijdıŋ ekı qarjylyq sudiasy Elisei saraiynda tergeu äreketterın ötkızgen. Is Panteonda ötken memlekettık eske alu räsımderın ūiymdastyruǧa bölıngen kelısımşarttarǧa qatysty.
Tergeu aiasynda soŋǧy jyldary Fransiianyŋ ūlttyq Panteonynda ötken bırqatar saltanatty şaralardy ūiymdastyrǧan Shortcut Events kompaniiasynyŋ qyzmetı tekserılude. Būl räsımderge prezident Emmanuel Makronnyŋ özı de qatysqan.
Le Monde deregıne säikes, būǧan deiın 14 säuırde jürgızılgen alǧaşqy tıntu äreketı nätije bermegen. Sol kezde Ūlttyq qarjylyq prokuratura men sybailas jemqorlyqqa qarsy bölım ökılderı Ūlttyq eskertkışter ortalyǧynda, Shortcut Events kompaniiasynyŋ keŋselerınde jäne ıs figuranttarynyŋ üilerınde tekseru jürgızgen. Alaida Elisei saraiyna kıruge rūqsat etılmegen.
Prezident äkımşılıgı būl şeşımdı Fransiia Konstitusiiasyndaǧy prezident rezidensiiasynyŋ qol sūǧylmauşylyǧy turaly bappen tüsındırgen.
Qazırgı uaqytta Fransiia bilıgı ıs boiynşa resmi mälımdeme jasaǧan joq. Tergeu jalǧasyp jatyr.
