Foto: Archer
Bırıkken Arab Ämırlıkterınıŋ astanasy Abu-Dabide ūşatyn taksi qyzmetın ıske qosu baǧytyndaǧy maŋyzdy kezeŋ bastaldy. Kaliforniialyq Archer Aviation kompaniiasy özınıŋ Midnight atty elektrlı aerotaksiıne qatysty synaqtardyŋ jaŋa kezeŋı BAÄ-de resmi türde bastalǧanyn mälımdedı. Būl turaly kompaniia jelıge video jariialady, dep habarlaidy "Adyrna" ūlttyq portaly.
Midnight äue kemesı şekteulı tiptegı sertifikat (RTC) alu baǧdarlamasyna engızıldı. Būl – BAÄ-nıŋ azamattyq aviasiia salasyndaǧy retteuşı organy General Civil Aviation Authority (GCAA) äzırlegen arnaiy tärtıp. Atalǧan baǧdarlama tolyq kommersiialyq sertifikattauǧa deiın ūşu apparattaryna şekteulı rejimde jūmys ısteuge mümkındık beredı.
Synaq reisterı aldymen ūşaqtyŋ tehnikalyq mümkındıkterın, äsırese Ämırlıkterdıŋ aptap ystyq klimatynda jūmys ısteu qabıletın tekseruge baǧyttalǧan. Sonymen qatar, kompaniia mamandary yqtimal äue baǧyttaryn zerttep, bolaşaq jolauşylar täjıribesın baǧalauda.
Joba aiasynda Abu Dhabi Aviation Group pen Archer Aviation kompaniialary yntymaqtastyq ornatqan. Ūşatyn taksiler Abu-Dabi qalasy ışınde, sondai-aq astana men Dubai arasynda qatynaidy dep josparlanyp otyr.
Mysaly, Abu-Dabi halyqaralyq äuejaiynan äigılı Emirates Palace qonaqüiıne deiıngı joldy 5–8 minutta eŋseruge bolady. Qazırgı taŋda būl baǧytty avtokölıkpen jürıp ötuge şamamen 45 minut qajet.
Midnight – tık ūşyp-qonu (eVTOL) tehnologiiasyna negızdelgen elektrlı äue kemesı. Ol bır ūşqyş pen tört jolauşyny tasymaldai alady. Ūşu jyldamdyǧy saǧatyna 241 şaqyrymǧa deiın jetedı.
Ūşaq tolyqtai elektr quatymen jūmys ısteidı jäne qysqa uaqyt ışınde qaita quattalyp, bırneşe reistı qatar oryndauǧa beiımdelgen. Būl ony ekologiialyq tūrǧydan tiımdı ärı qalalyq infraqūrylymǧa ikemdı kölık qūralyna ainaldyrady.
2025 jylǧy 8 qazanda Cleveland Clinic Abu Dhabi auruhanasy öz bazasynda BAÄ-degı alǧaşqy vertiport salu josparyn jariialady. Būl alaŋ şūǧyl medisinalyq kömek körsetu jäne donorlyq aǧzalardy jedel tasymaldau maqsatynda paidalanyluy mümkın.
Kompaniia ökılderınıŋ aituynşa, Abu-Dabi älemdegı aerotaksi qyzmetın alǧaşqylardyŋ bırı bolyp kommersiialyq türde ıske qosatyn qalaǧa ainaluy yqtimal. Būl joba sättı jüzege assa, Parsy şyǧanaǧy elderı üşın jaŋa aviasiialyq hab qalyptasuy mümkın.
Äzırge resmi tarif bekıtılgen joq. Degenmen, kompaniia ökılderı bastapqy kezeŋde baǧalar premium sanattaǧy qyzmet deŋgeiınde bolatynyn mälımdedı:
-
Abu-Dabi ışınde – şamamen 300–350 dirham;
-
Abu-Dabi – Dubai baǧyty – 800–1500 dirham.
Uaqyt öte kele qyzmet auqymy keŋeiıp, tiımdılık artqan saiyn baǧany qarapaiym taksi deŋgeiıne deiın tömendetu közdelıp otyr.
