Astana qalasyndaǧy №9 «Zerde» mamandandyrylǧan liseiınıŋ 11-synyp oquşysy Aiala Mahanbetälı älemnıŋ jetekşı on universitetınen bırden resmi şaqyrtu aldy. Äkımdıktıŋ mälımetınşe, erekşe jetıstık – būl şaqyrtular talapkerdıŋ jeke ötınışı negızınde emes, joǧary oqu oryndarynyŋ öz bastamasymen joldanǧan, dep habarlaidy "Adyrna".
Şaqyrtu joldaǧan universitetterdıŋ qatarynda Ivy League qūramyna kıretın Harvard University men Brown University, sondai-aq University of Cambridge, Stanford University, Massachusetts Institute of Technology (MIT) jäne älemdık bedeldı reitingterde köş bastap tūrǧan özge de aldyŋǧy qatarly joǧary oqu oryndary bar.
Basty erekşelıgı – universitetterdıŋ oquşynyŋ akademiialyq jäne zertteuşılık äleuetın aldyn ala jan-jaqty saralap, sonyŋ negızınde oquǧa şaqyrǧan. Mūndai täjıribe älemdık joǧary bılım beru keŋıstıgınde sirek kezdesedı jäne talapkerge körsetılgen joǧary senımnıŋ aiqyn dälelı sanalady.
Oquşyǧa ūsynylǧan qarjylyq qoldaudyŋ jalpy kölemı 2 million AQŞ dollaryn qūraidy. Atalǧan qarajat oqu şyǧyndaryn tolyq nemese ışınara öteuge mümkındık beredı.
«Aialanyŋ akademiialyq joly 8-synyptan bastau alady. Osy uaqyt aralyǧynda ol halyqaralyq bılım beru baǧdarlamalaryna, akademiialyq jäne ǧylymi-zertteu jobalaryna tūraqty türde qatysyp keledı. Universitetterden resmi şaqyrtu alǧanǧa deiın ol ärtürlı elderden kelgen qatysuşylarmen bırlesıp halyqaralyq jobany ıske asyryp, ony praktikalyq deŋgeide jüzege asyra bıldı. Joba investisiia tartyp, naqty nätijege qol jetkızgen.
Qazırgı taŋda Aiala Kanadada ornalasqan kompaniiada osy joba aiasynda jūmys ıstep, mekteptegı oquyn käsıbi qyzmetpen qatar alyp jür. Sonymen qatar, ol 11-synyp oquşysy bola tūra, universitettık kurstardan ötıp, bolaşaqta esepteletın akademiialyq kreditterdı aldyn ala meŋgerude.
Būl jetıstık älemnıŋ jetekşı universitetterınıŋ zamanaui ūstanymyn aiqyn aŋǧartady. Bügınde olar tek üzdık talapkerlerdı ırıkteumen şektelmei, akademiialyq äleuetı joǧary mekteptermen tıkelei serıktestık ornatuǧa erekşe män berıp otyr», – delıngen Astana äkımdıgınıŋ habarlamasynda.
