Foto: Kursiv.kz
Almatyda Social Impact Awards 2025 qaiyrymdylyq auksiony öttı. Onda Dınmūhamed Qonaevtyŋ galstugı men Denis Tennıŋ raritet konkiı saudalandy, dep zabarlaidy “Adyrna” portaly Kursiv.Media saityna sıltep.
Aqparatqa säikes, auksion lottary arasynda Qazaqstan tennis federasiiasy, D.A. Qonaev qory, Denis Ten qory, Lermontov atyndaǧy teatr, Gerold Belgerdıŋ otbasy, suretşı Äsel Kenjetaeva jäne basqa da tūlǧalardyŋ sirek kezdesetın bıregei zattary boldy.
Köpşılıktıŋ nazary auǧan lottardyŋ bırı – ataqty mänerlep syrǧanauşyǧa tiesılı konki. Bastapqy baǧasy 500 myŋ teŋge bolǧanymen, qūny sauda barysynda bes esege köterıldı. Eŋ joǧary baǧany qazaq estradasynyŋ änşısı Ǧalymjan Moldanazar ūsyndy. Ol konkilerdı 2,5 mln teŋgege satyp aldy.
«Men Denispen tanys edım, aralasyp tūratynbyz. Öte meiırımdı, keremet jıgıt edı. Sol künderdıŋ estelıgı retınde onyŋ konkilerı maǧan būiyrǧanyna quandym», – dedı ärtıs.
Auksionǧa qoiylǧan eŋ qymbat zat – saiasi qairatker Dınmūhamed Qonaevtyŋ galstugı. Ony qazaqstandyq biznesmen Erkın Tätışev 12 mln teŋgege satyp aldy.
Sonymen bırge auksionda Viacheslav Liuikonyŋ «Asqanǧa tosqan» spektaklıne daiyndaǧan eskizı, Daniil Medvedev qoltaŋbasy bar tennis doby, Äsel Kenjetaevanyŋ «Trubka ūstaǧan äiel» kartinasy qoiyldy. Būǧan qosa, Piter Foster men Serık Tölekpaevpen kezdesu mümkındıgı siiaqty lottar ūsynyldy.
Jinalǧan 87 mln teŋge äleumettık jobalarǧa grant retınde berıledı, al auksionnan tüsken qarajat ız-tüssız joǧalǧan adamdardy ızdeumen ainalysatyn Lider.kz erıktıler bırlestıgın qoldauǧa jūmsalady.
