15 tamyzdan bastap tūrǧyn üi sektorynda örttıŋ aldyn aluǧa jäne halyqtyŋ bılım deŋgeiın arttyruǧa baǧyttalǧan ört qauıpsızdıgı aksiiasy ötkızılude.
TJM aumaqtyq bölımşelerı äleumettık jaǧynan osal toptarǧa jatatyn 108 442 tūrǧyn üidı jäne 225 599 köpbalaly otbasyn esepke aldy. Bügıngı taŋda 112 969 üide profilaktikalyq jūmys jürgızılıp, onyŋ barysynda 289 387 azamatqa nūsqaulyq berıldı. Üi-jailardy aralau barysynda 18 myŋnan astam üi ört qauıpsızdıgı talaptaryna sai keltırıldı. Biylǧy jyldyŋ 15 tamyzynan 3 qazanyna deiıngı aralyqta tūrǧyn üilerge 9 536 datchik ornatyldy.
Öŋırlerde tūrǧyn sektorda örtterdıŋ aldyn alu maqsatynda keşendı profilaktikalyq ıs-şaralar jürgızılude. Būl ıs-şaranyŋ negızgı maqsaty – jylytu mausymynda tötenşe jaǧdailardyŋ aldyn alu jäne ört qauıpsızdıgın qamtamasyz etu. Reidter barysynda TJD qyzmetkerlerı profilaktikalyq äŋgımeler jürgızıp, nūsqaulyqtar ötkızıp, jylytu jüielerın, elektr qūraldaryn, gaz jabdyqtaryn qauıpsız paidalanu erejelerın jäne ört qauıpsızdıgı talaptaryn tüsındıredı.
Almaty oblysy TJD jergılıktı atqaruşy organdarmen jäne volonterlık ūiymdarmen bırlesıp, tūrǧyn sektorda profilaktikalyq jūmystardy küşeittı. Äleumettık osal toptarǧa jatatyn azamattar men köpbalaly otbasylar tūratyn üilerge erekşe nazar audaryluda. Bügıngı taŋda 1000-nan astam üige aralau jürgızıldı. Öŋırde qosymşa qoldaudy qajet etetın azamattar tūratyn 3000-nan astam tūrǧyn üi jäne 1000-nan astam köpbalaly otbasy üiı esepke alynǧan. Azamattarǧa 100-den astam uly gaz datchigı ornatyldy. Sonymen qatar peşpen jylytu jüielerın jöndeuge, elektrmen jabdyqtau jüielerın qalpyna keltıruge kömek körsetılıp, mūrjalar küieden tazartyluda.
Şyǧys Qazaqstan oblysy TJD qyzmetkerlerı peşpen jylytylatyn, äleumettık osal sanattaǧy azamattar tūratyn tūrǧyn üilerdı aralap, ört qauıpsızdıgı erejelerınıŋ saqtaluyn közben şolyp tekserude. 319 üide 379 ört qauıpsızdıgı būzuşylyǧy anyqtalyp, sonyŋ 185-ı mamandardyŋ ūsynymdary arqyly sol jerde joiyldy. Tekseru barysynda üilerge uly gaz datchikterı ornatylyp, üilerdı örtke qarsy qauıpsız jaǧdaiǧa keltıruge kömek körsetılude. Jalpy öŋırde soŋǧy jyldary şamamen 16 000 datchik ornatylyp, olardyŋ kömegımen 42 adamnyŋ ömırı qūtqaryldy.
Batys Qazaqstan oblysy TJD qyzmetkerlerı «QAZAQGAZ AIMAQ» AQ BQF mamandarymen, polisiia qyzmetkerlerımen, gaz-tehnikalyq inspeksiia ökılderımen jäne volonterlermen bırlesıp profilaktikalyq ıs-şaralar ötkızude. Tūrǧyn üilerdı aralau barysynda anyqtalǧan ört qauıpsızdıgı erejelerın būzu faktılerı boiynşa azamattarǧa tiıstı ūsynymdar berıldı. Qyzmetkerler 13 myŋnan astam tūrǧyn üidı qamtyp, 260-tan astam uly gaz datchigın ornatty.
TJM azamattarǧa jylytu mausymynda ört qauıpsızdıgı erejelerın qataŋ saqtau qajettıgın eskertedı:
- tek jaramdy peşter men elektr qūraldaryn qoldanyŋyz;
- elektr jelılerın şamadan tys jüktemeŋız;
- mūrjalardy uaqytynda küieden tazartyŋyz;
- jylytu jüielerınıŋ jaǧdaiyn ünemı tekserıp otyryŋyz;
- balalardy eresekterdıŋ qarauynsyz qaldyrmaŋyz;
- tūtatqyş retınde janǧyş sūiyqtyqtardy paidalanbaŋyz.
Qauıpsızdık talaptaryn saqtau — öz ömırıŋızdı jäne jaqyndaryŋyzdyŋ ömırın saqtaudyŋ kepılı.
