Mäjılıs deputaty Baqytjan Bazarbek Almatyda ötken «Qairat» – «Real Madrid» matchynyŋ ūiymdastyryluynda olqylyqtar bolǧanyn aitty, dep habarlaidy «Adyrna» tılşısı.
Ol biletke qomaqty qarjy tölegen janküierlerdıŋ ülken kezek pen qysymǧa tap bolyp, stadionǧa oiyn bastalǧannan keiın ǧana kıre alǧanyn mälımdedı.
«Ūiymdastyru jūmystary syn kötermeidı. Halyqtyŋ qyspaǧy qauıptı jaǧdaiǧa äkeldı. Arasynda balalar da boldy. Oqiǧa ornynda JQAJ, IIM jäne ışkı äsker qyzmetkerlerı boldy, bıraq olar körermenderdı kırgızuge kömektespei, tek qarap tūrdy», dedı deputat.
Bazarbektıŋ aituynşa, qolynda biletı bar köptegen janküier alǧaşqy ysqyryqtan keiın de 10–20 minut kütuge mäjbür bolǧan. Al dälızderde biletı joq jandar otyryp alǧan. Bilet baǧasy şaryqtap ketkenıne qaramastan, ūiymdastyruşylar qarapaiym jailylyq pen qauıpsızdıktı qamtamasyz ete almaǧan.
Sondai-aq deputat matchqa şamamen 5 myŋ bilet «Samūryq-Qazyna», «Bäiterek» jäne basqa da ūlttyq kompaniialar qyzmetkerlerı tarapynan satyp alynǧan boluy mümkın degen aqparatty tekserudı talap ettı.
«Eger būl rastalsa, öte maŋyzdy sūraq tuyndaidy. Biletter jeke qarajatqa alyndy ma, älde memlekettık resurstar esebınen be? Biudjet qarjysyn mūndai maqsattarǧa paidalanu müldem jol berılmeidı»,– dep atap öttı Bazarbek.
Ol qūqyq qorǧau organdaryn bilet saudasyndaǧy yqtimal alypsatarlyq shemalardy tekserıp, kınälılerdı jauapqa tartuǧa şaqyrdy.
«Qairat» alǧaş ret Chempiondar ligasynda oinap jatyr. Sondyqtan matchy ūiymdastyruda da joǧary standarttarǧa sai boluymyz kerek»,– dedı deputat.
