Resei prezidentı Vladimir Putin Ukraina basşysy Vladimir Zelenskiimen kezdesuge kelıstı, dep habarlaidy "Adyrna" ūlttyq portaly.
Būl turaly Fox News efirınde AQŞ memlekettık hatşysy Marko Rubio mälımdedı.
Rubionyŋ aituynşa, ekı el köşbasşylarynyŋ kezdesuın AQŞ prezidentı Donald Tramp ūsynǧan. Qazır amerikalyq tarap būl bastamany jüzege asyru baǧytynda jūmys jürgızıp jatyr.
«Eger bärı oidaǧydai bolsa, kelesı kezdesu Putin, Tramp jäne Zelenskiidıŋ basqosuymen ötedı dep senemın. Sol jerde kelısımdı tüpkılıktı bekıtemız degen oi bar. Äzırge bastysy – Putinnıŋ "Zelenskiimen kezdesemın" degen kelısımı. Būl üş jarym jyldan berı bolmaǧan jaǧdai», – dedı Rubio.
Sonymen qatar Reseidıŋ syrtqy ıster ministrı Sergei Lavrov ta pıkır bıldırıp, mūndai kezdesudıŋ jaqyn arada bolmaitynyn aŋǧartty.
«Resei Ukraina mäselesın retteu boiynşa eşqandai formattan bas tartpaidy. Degenmen eŋ joǧarǧy deŋgeidegı kezdesulerdı asa mūqiiat daiyndyqpen ötkızu qajet», – dedı Lavrov.
