Qorǧanys ministrlıgı Sorbūlaqta jürgızılgen ızdestıru operasiiasy barysynda ekınşı mäiıttı tapty, dep habarlaidy "Adyrna" ūlttyq portaly.
«EC-145 tıkūşaǧynyŋ qūlaǧan jerınde jürgızılıp jatqan ızdestıru-qūtqaru jūmystary barysynda ekınşı mäiıt tabylyp, su betıne köterıldı. Qazırgı uaqytta qūzyrly organdardyŋ qatysuymen jeke basyn anyqtau prosedurasy jürgızılude», – delıngen Qorǧanys ministrlıgınıŋ habarlamasynda.
Aqparatta ızdestıru jūmystary Qorǧanys ministrlıgı, TJM, IIM jäne basqa da vedomstvolardyŋ barlyq qajettı küşterı men qūraldaryn tarta otyryp, täulık boiy jürgızılıp jatqany eske salyndy.
Būǧan deiın Sorbūlaq kölınde şamamen 14 metr tereŋdıkten joǧalǧan tıkūşaqtyŋ bölşekterı men mäiıttıŋ tabylǧany, jeke basyn anyqtau prosedurasy jürgızılıp jatqany habarlanǧan edı.
Vedomstvo mälımetınşe, ızdeu jūmystaryna su astyndaǧy naşar körınu men laily şögındıler kedergı keltırude. Būl süŋguırler men injenerlık bölımşelerdıŋ jūmysyn baiaulatady.
Eske salsaq, Almaty oblysynda EC-145 äskeri tıkūşaǧy radardan joǧalyp ketken edı. 26 şıldede äue kemesınıŋ synyqtary Sorbūlaq kölınıŋ akvatoriiasynan tabylǧan, alaida ekipajdy ızdeu älı de jalǧasyp jatyr.
