Qyrǧyzstan prezidentı Sadyr Japarov būqaralyq aqparat qūraldary men internette jalǧan aqparat taratqandarǧa aiyppūl saludy közdeitın zaŋǧa qol qoidy, dep habarlaidy «Adyrna» tılşısı.
«Prezident Sadyr Japarov Qyrǧyz Respublikasynyŋ Qūqyqbūzuşylyqtar turaly kodeksıne özgerıster engızu turaly zaŋǧa qol qoidy»,– delıngen habarlamada.
Zaŋnamaǧa engızılgen özgerıster BAQ pen internette jalǧan aqparat taratqany üşın aiyppūl saludy qarastyrady. Mūndai qūqyqbūzuşylyqtar üşın jeke tūlǧalarǧa sot şeşımımen 20 myŋ qyrǧyz somy (şamamen 119 myŋ teŋge — red.), al zaŋdy tūlǧalarǧa – 65 myŋ som (şamamen 388 myŋ teŋge — red.) kölemınde aiyppūl salynady.
«Zaŋnyŋ maqsaty – aqparattyq qauıpsızdıktı qamtamasyz etu jäne azamattardyŋ şynaiy, obektivtı aqparat aluǧa degen qūqyqtaryn qorǧau»,—delıngen resmi habarlamada.
