Qazaqstan astanasynda ötken Ortalyq Aziia men TMD keŋıstıgındegı eŋ ırı pop-mädeniet festivalınde Esai Morales, bloger Nastia Djekson, strimerler, dubliaj akterlerı men ärtürlı elderden kelgen kosplei şeberlerı körermendermen jüzdestı.
Festivaldıŋ ekınşı künı «Barys Arena» sport keşenındegı basty sahnanyŋ aşyluymen bastaldy.
Mūz arenasynyŋ üstı arnaiy jabynmen jabylǧanmen, salqyndyq sezıldı. Bıraq zalda kerısınşe naǧyz jyly atmosfera ornady. Janküierler tanymal bloger Nastia Djeksondy quanyşpen qarsy aldy. Onyŋ YouTube arnasynda 2,5 millionǧa juyq jazyluşy bar.
Nastia mistikalyq oqiǧalar, qūpiia teoriialar men adamnyŋ boiyn tıtırkendıretın videolarymen tanymal. Ol jai ǧana video tüsırmeidı, körermendı özıne tartyp alatyn dünie jasaidy. Onyŋ ūrany: «Barlyǧy bır körıngennen bılınbeidı...».
Janküierler Nastiadan süiıktı filmderı men multfilmderı turaly, ideialardy qaidan alatyny jäne bolaşaqta özın kım retınde köretını jaily sūrady.
«Men ünemı jazbalar jasap otyramyn, kompiuterge, telefonǧa. Külkılı nemese qyzyqty dünienı közım şalsa, bırden jazyp alamyn. Keiın sol jazbalardan video jasap şyǧaramyn. TikTok-ta bır erekşe video körsem, onyŋ artynda ne tūrǧanyn zerttep, soǧan bailanysty video-taldau jasaimyn», – dedı Nastia Djekson janküierlerımen kezdesude.
Onyŋ aituynşa, däl osy mistikalyq taqyryptar men türlı qūbylystardy äşkereleu — arna janküierlerın bırıktıretın negızgı sebep.
Sondai-aq, Nastia bır qūpiiamen bölıstı. Ol kelesı videosynda jaŋa keiıpker paida boluy mümkın ekenın aitty. Būl keiıpker būrynnan bar Şellige qosylady.
Al 40 jyldan astam Gollivudta jūmys ıstep kele jatqan akter Esai Morales janküierlerımen özınıŋ ömırlık täjıribesı men tereŋ oilarymen bölıstı.
Esai Morales terıs keiıpkerdı oinaudyŋ nege akter üşın ülken synaq ekenın tüsındırdı.
«Jaǧymsyz keiıpkerdı oinau – būl ülken qūrmet. Öitkenı basty keiıpker öz jolynda kezdesken qiyndyqtardy jeŋe otyryp, damidy. Al sol qiyndyqtardy bız, antagonister, tuǧyzamyz», – dedı akter.
Sondai-aq, Esai Morales qazaq halqy men puerto-rikolyqtar arasynda ūqsastyq köp ekenın atap öttı.
Festival aiasynda jūldyzdar alleiasynda janküierlermen belgılı bloger-letspleişı Marmok, qytai-amerikalyq model, kospleişı jäne kostium dizainerı Yaya Han, reseilık rejissior, ssenarist, videobloger jäne YouTube-tegı «Chiornyi kabinet» arnasynyŋ avtory Artiom Gutkovskii jäne basqa da tanymal tūlǧalar kezdestı.
Festival qonaqtary jaŋa daǧdylar men şeberlıktıŋ qyr-syryn master-klass aimaǧynda meŋgerdı. Mūnda qonaqtar qylyştasudy, tūmar men kostium bölşekterın jasaudy, anime men filmderdı dybystaudy üirene aldy.
Avtorlar alleiasy men järmeŋke aimaǧynda 150-den astam qazaqstandyq suretşı men qolöner şeberı öz jūmystaryn ūsyndy. Olar – türlı janrda eŋbek etetın talantty şeberler.
Biylǧy Comic Con Astana-2025 festivalı 9-13 şılde aralyǧynda ötude jäne 75 000-nan astam qonaqty qabyldaidy. Olardyŋ ışınde kemınde 10 000-y – şeteldık turister.
Comic Con Astana-2025 Astana qalasy äkımdıgı men «Astana Tourism» turizmdı damytu ortalyǧynyŋ qoldauymen ötude.
