Sambodan älemnıŋ ekı dürkın jüldegerı Aisara Kerımbekova 20 jyldan berı aula sypyryp jür. Sportşynyŋ qazırgı jai-küiın belgılı jurnalist Nūrseiıt Jylqyşybai Instagram jelısındegı paraqşasynda körsettı, dep habarlaidy «Adyrna» tılşısı.
«Būl — masqara! Būl — ūlttyq namysqa syn! Ministrler mınberden tüspei jatyr, ardager sportşy auladan şyqpai jür. Qaidasyŋ, Sport jäne turizm ministrı? Tırı aŋyzǧa tırısınde qūrmet körsetu paryz emes pe? Batyrdy baǧalamaǧan elden qandai ūrpaq şyǧady? Ūiat emes pe, aǧaiyn?»—dedı ol.
Jurnalistıŋ jazbasyna qaznet qoldanuşylary türlı pıkır qaldyrdy.
«Auyr jaǧdai», «Tırı aŋyz aula sypyruşy bolyp jür», «Bilık ne qarap otyr?»—dedı olar.
Aita keteiık, Aisara Kerımbekova 1965 jyly Almaty oblysynda düniege kelgen. Ol sambodan halyqaralyq därejedegı sport şeberı, dziudodan sport şeberı, Qazaqstannyŋ üş dürkın chempiony, qazaq qyzdarynyŋ arasynda Älem kubogyn ielengen sportşy. 1992 jyly elımızdıŋ taŋdauly on sportşysy qataryna engen.
