Qazaqstan Respublikasynyŋ Prezidentı Qasym-Jomart Toqaev halyqty Astana künımen qūttyqtap, elordanyŋ el damuyndaǧy rölın erekşe atap öttı.
Memleket basşysy biylǧy Astana künı qasiettı Dombyra künımen tūspa-tūs keluınıŋ simvoldyq mänı zor ekenın atap öttı. Onyŋ aituynşa, dombyra – Ūly dalanyŋ myŋjyldyq mädeni mūrasy bolsa, Astana – Qazaqstannyŋ tūraqty damu men örkendeu jolyndaǧy nyşany.
«Astana – elımızdıŋ qoǧamdyq, saiasi jäne ıskerlık ordasy. Būl jerde halqymyzdyŋ bolaşaǧyna qatysty maŋyzdy şeşımder qabyldanady, ozyq ideialar ıske asyp, biık maqsattar oryndalady», – dedı Prezident.
Sondai-aq Qasym-Jomart Toqaev Astananyŋ jahandyq deŋgeide beibıtşılık pen kelısımnıŋ simvolyna ainalǧanyn atap ötıp, elordanyŋ Ädılettı, Taza jäne Quatty Qazaqstandy qūru jolyndaǧy reformalar ortalyǧy retınde qyzmet ete beretının aitty.
«Elordamyz ärdaiym tübegeilı özgerıster men auqymdy reformalardyŋ bastauynda tūrady», – dedı Memleket basşysy.
Prezident elımızdıŋ ärbır azamatyna zor densaulyq pen baq-bereke tılep, Astananyŋ örkendei beruıne tılektestık bıldırdı.
Astana künı – Qazaqstannyŋ elordasy Astananyŋ qūrmetıne arnalǧan ūlttyq mereke. Ol jyl saiyn 6 şıldede atap ötıledı. Būl kün Qazaqstan Respublikasynyŋ Tūŋǧyş Prezidentı Nūrsūltan Nazarbaevtyŋ tuǧan künımen tūspa-tūs kelgendıkten 2008 jyly resmi türde merekelık kün retınde bekıtıldı.
Elorda 1997 jyly Almatydan Aqmolaǧa köşırılıp, 1998 jyly resmi türde Astana dep ataldy. Al 2019–2022 jyldary qala Nūr-Sūltan atauyn ielenıp, 2022 jyldyŋ qyrküiegınde Astana atauy qaita qaitaryldy.
Bügınde Astana — Ortalyq Aziiadaǧy eŋ zamanaui qalalardyŋ bırı, säuletı men infraqūrylymy älemdık deŋgeidegı jobalarmen salystyrylady. Qalada köptegen halyqaralyq forumdar, sezder men kelıssözder ötedı.
