ZTB jobasynyŋ negızın qalauşy Marǧūlan Tūrsynov äleumettık jelıde jazǧan pıkırı arqyly qoǧamda ülken dau tuǧyzdy. Threads paraqşasynda ol elımızdegı orystardy «äldeqaida bılımdı, jauapty jäne tūraqty» dep ataǧan bolatyn, dep habarlaidy “Adyrna”.
«Bızdıŋ elde orystarǧa qatysty ūltşyldyq baiqalady. Men köp jaǧdaida olarǧa jügınemın. Öitkenı men olardy äldeqaida bılımdı, jauapty ärı tūraqty dep sanaimyn», – dep jazdy Tūrsynov.
Būl mälımdeme jelı qoldanuşylary tarapynan terıs qabyldandy. Köpşılık ony «qūldyq sana körınısı», «ūltty kemsıtu» dep baǧalap, aşyq synǧa aldy.
«Özımızge baǧa beru üşın bıreudı aspandatyp, özımızdı jerge ūrudyŋ keregı joq. Taǧy ony orys tılınde jazdyŋyz. Janyŋyz aşysa, qazaqşa jazyŋyz», – dep pıkır qaldyrdy beosendı qoldanuşynyŋ bırı.
Qoǧamnyŋ reaksiiasy men synnan keiın Marǧūlan Tūrsynov atalǧan jazbasyn öşırıp tastap, keşırım sūraǧan. Alaida, köp ūzamai keşırım sūraǧan jazbasy da jelıden joǧalyp ketken.
Būl oqiǧa tek jelıdegı pıkırtalaspen şektelmei, zaŋ aiasynda jauapkerşılık mäselesıne de ūlasty. Belgılı PR mamany Aibar Oljai Tūrsynovtyŋ jazbasyndaǧy «olar äldeqaida bılımdı, jauapty jäne tūraqty» degen tırkestı “ūlttyq arazdyqty qozdyru” dep baǧalap, Qazaqstan Respublikasy Qylmystyq kodeksınıŋ 174-babyn būzu mümkındıgıne nazar audardy. Tiıstı tūlǧa osy mäselege bailanysty Bas prokuraturaǧa resmi aryz joldaǧanyn mälımdedı.
«ZTB pabligınıŋ iesı Marǧūlan Tūrsynov jazǧan pıkır — bır ūltty bır ūlttan joǧary qoiu. Būl — "ariilık rasanyŋ üstemdıgı" degen faşistık ideologiiaǧa ūqsas. Sol sebeptı Bas prokuraturaǧa materialdardy tırkep, aryz tüsırdım. Prokuratura öz tarapynan tekserıs jürgızedı nemese Işkı ıster ministrlıgıne joldaidy».
Qazırgı uaqytta būl ıs boiynşa resmi organdar tarapynan qandai da bır mälımdeme jasalǧan joq. Qoǧam belsendılerı men jelı qoldanuşylary būl mäselenı jıtı baqylap otyr.
