Ýaqytysynda ulttyq sporttyń qarjysy talan-tarajǵa ketip jatyr, shuǵyl tekserý kerek dep, dabyl da qaqtym! Qamshy ustap, astyndaǵy «asaý attardy» baǵyndyryp júrgen biraz jigitter únsiz otyrǵanda, etek kıgen myna men qanshama shyryldadym!
«Samuryq-Qazyna» qor bolǵanmen, ol qorǵa qarjy memlekettik bıýdjetten bólinedi! Al memlekettik qarjy ol — halyqtyń aqshasy! Bekbolat Tileýhan Ulttyq sportty quldyratty, kemshilikter kóp, prezıdenttikten alyp tastaý kerektigin aıtyp, talap etkenimde — osyndaǵy birazy maǵan qarsy shyǵyp, jabylǵan edi! Qarapaıym qyzmetkerler bes myń tyń teńge para alǵany úshin — jemqorsyń dep jeti jylǵa qamap qoıamyz, al Eldiń qazynasyn mıllıardtap jegen «saýysqandy» — jáı ǵana shetel asyryp, úndemeı otyra beremiz be?
Ádiletti Jańa Qazaqstanymyz qaıda qaldy? Zań tek —jarly-jaqybaı men qarapaıym halyqqa ǵana emes, shendi men shekpendi, baı-baǵlanǵa da, jalpy jurtshylyqqa birdeı teń dárejede qoldanylýy qajet! El kórip otyr! Qazir osylaı zańsyzdyqtarǵa kóz jumyp, kórmegen keıip tanytsaq — erteń Halyq ádildik izdep kúıinip, ashyq kúreske shyǵady! Sondyqtan ádil qadam — Eldiń yntymaǵy men senimin nyǵaıtyp, zańǵa baǵynýyna yqpal etedi!
Eks-jattyqtyrýshy Ramazan myrzanyń aıtyp otyrǵandary ras bolsa, Ulttyq qaýipsizdik komıteti shuǵyl túrde Bekbolatty elge aldyryp, qylmystyq is ashyp, jaýapqa tartýy kerek! Qaırat Satybaldymen tikeleı baılanysy bar adam jazasyz qalmaý kerek!
"Adyrna" ulttyq portaly
