«QazMunaıGaz» UK AQ (budan ári – QMG) Basqarma tóraǵasy Maǵzum Myrzaǵalıev shildeniń 15-i kúni munaı óńdeý zaýyttarynda (MÓZ) jospardan tys toqtap qalýlar men oqys oqıǵalardy aldyn alý jóninde jıyn ótkizdi.
Kompanııa tóraǵasy, QMG munaı óńdeý blogynyń jáne otandyq MÓZ basshylary QR Prezıdenti Qasym-Jomart Toqaevtyń Úkimettiń keńeıtilgen otyrysynda bergen tapsyrmalaryn oryndaý máselelerin talqylady.
M.Myrzaǵalıev el Prezıdenti MÓZ qyzmetin birneshe ret synǵa alǵanyn atap aıtty. Shildeniń 14-i kúni Memleket basshysy Úkimettiń keńeıtilgen otyrysynda MÓZ-derdegi jospardan tys toqtap qalýlardyń saldarynan jekelegen kezeńderdegi munaı ónimderiniń tapshylyǵy máselesine toqtaldy.
«Zaýyttar menedjmenti óndiris proesiniń kúrdeliligine jáne kez kelgen óndiriste sııaqty shtattan tys jaǵdaıdardyń saqtalyp otyrǵan qaýipine qaramastan, oqys oqıǵalar úshin qashanda jaýapty bolady. Munaı óńdeý zaýyttarynyń basshylary bul máseleni únemi qatań baqylaýda ustap, qandaı da bir qaýip-qater kezinde shuǵyl túrde tıisti sharalar qabyldaýǵa tıis», - dedi ulttyq kompanııa basshysy.
Atyraý, Shymkent jáne Pavlodar munaı óńdeý zaýyttarynyń basshylary oqys oqıǵalardy aldyn alý jáne jabdyqtyń beriktigin arttyrý boıynsha qolǵa alynǵan sharalar týraly esep berdi. Sonymen qatar zaýyttar menedjmenti QMG basshylyǵyna 2020-2021 jyldary jáne 2022 jyldyń birinshi jartyjyldyǵynda óndiriste bolǵan oqys oqıǵalar men toqtap qalýlardyń taldaýyn usyndy. Olardyń bergen málimeti boıynsha, 2020-2021 jyldary barlyq úsh MÓZ-de toqtap qalýdyń 401 faktisi tirkelgen: AMÓZ-de 341, onyń 60-y oqys oqıǵa, PMHZ – 13, onyń 10 oqys oqıǵa, PQOP-ta – 47, onyń 11-i oqys oqıǵa. Taldaýda MÓZ-derdiń josparly toqtap qalýlary esepke alynbady.
Jıyn sońynda munaı óńdeý zaýyttarynyń turaqty jumysyn arttyrý úshin sharalardy kúsheıtý boıynsha sheshimder qabyldandy jáne usynystar engizildi. Budan bólek, MÓZ-der úshin satyp alý erejelerin jetildirýdi jalǵastyrý, sondaı-aq qoımada qosalqy bólshekter men shyǵyn materıaldar qorynyń kepildikti rezervin qamtamasyz etý qajettiligi atap ótildi.
Anyqtama:
Oqys oqıǵa degenimiz kásiporyn jumysynyń ishki sebepterine baılanysty bolǵan shtattan tys oqıǵa. Ol óndiris josparynyń ortasha aılyq oryndalýyna keri áser etedi.
