Qazaqstan Respýblıkasy Parlamenti Májilisiniń Depýtaty Kýzıev Zakırjan Ekologııa, geologııa jáne tabıǵı resýrstar mınıstrine depýtattyq saýal joldady, dep habarlaıdy «Adyrna» tilshisi.
Aıtýynsha, Almaty oblysy men jeke bólinip shyqqan Jetisý oblysynyń taýly, ormandy aýdandardyń halqymen kezdesýde jer máselesi jıi qozǵalǵan.
«Qurmetti Serikqalı Amanǵalıuly! Meniń depýtattyq saýalym – memlekettik orman qory jerlerin jekelegen adamdardyń ań sharýashylyǵy úshin paıdalanýy jaıynda.
Az ǵana toptyń jalpy halyqqa arnalǵan, onyń ishinde eń jaqsy jerlerdi ıemdenip alǵany bizdi qatty oılandyrady. Bul «Basqa jerdiń gúlinen, týǵan jerdiń tikenin artyq» kóretin halyqtyń kóp jyldardan beri janyna batyp keledi. Tipti, ormanshylar arasynda «Zona pokoıa» dep atalatyn aımaqtarǵa qol salyp, ańdardy jappaı joıý ádetke aınalǵan.Almaty oblysyndaǵy Raıymbek, Kegen, Eńbekshiqazaq jáne Uıǵyr aýdandarynda ormandy jerlerdi ań sharýashylyǵy úshin barlyǵyn taratyp berýden memleket ne utty? degen zańdy suraq shyǵady. Túsinikti bolý úshin myna mysalddardy keltireıin. Kegen aýdanynda memlekettik orman qorynan 415 myń gektar jer 12 adamǵa tıesili bolsa, Raıymbek aýdanynda 523 myń gektar jerdi nebary 11 adam ań sharýashylyǵy úshin qorshap alǵan. Al Uıǵyr aýdanynda jaǵdaı tipti qıyn. Jergilikti ákimdik málimetinshe memlekettik orman qory men memlekettik jerden 415 myń gektar jerdi bar-joǵy ań sharýashylyǵyn júrgizemiz degen maqsatta 6 adam bólip alǵan. Bul aýdandaǵy ormandy jerlerdiń 97 paıyzyn quraıdy.
Sonda tek qana osy úsh aýdanda bir jarym mıllıon gektar jer bar-joǵy 30 adamnyń ǵana qolynda.
2000 jyldarǵa deıin jaılaýdaǵy orman sharýashylyǵy Leshozdarǵa qarasa, jerin halyq shabyndyq pen mal baǵýǵa qoldanatyn.
Qazir halyq maldy aýyldaǵy qorasynda qamap ustap, sanıtarlyq-veterınarlyq talaptardy buzýǵa májbúr. Sebebi jaılaýdyń «qojaıyndary» sońǵy 15-20 jylda maldy ol jerge kirgizbeıdi.
Bul másele týraly aýdan halqy oblys ákimine, Ekologııa, geologııa jáne tabıǵı resýrstar mınıstrligine hat jazýdan sharshaǵan.Atalǵan ań sharýashylyqtarynyń ıeleri Almaty, Nur-Sýltan, Taldyqorǵan sııaqty iri qalalarda turady. Al, aýyl halqynyń mal jaıyp, shóp shabatyn jerlerine ań aýlap, saıat qurý úshin anda-sanda keledi. Bul eldiń ashýyn týdyryp, áleýmettik teńsizdikke soqtyrady. Osy jerlerge qatysty jedel sheshim shyǵarýdy suraımyn»,– dedi ol.
