Parlamenttiń II sessııasynda depýtattar Úkimetpen birlesip, 78 zań qabyldady. Bul týraly búgin Senat Tóraǵasy Máýlen Áshimbaev málimdedi, dep habarlaıdy «Adyrna» tilshisi «Habar 24»-ke silteme jasap.
Aıtýynsha, zań shyǵarý proesinde adam quqyqtaryn qorǵaý men halyqtyń áleýmettik jaǵdaıyn jaqsartýǵa erekshe basymdyq berildi. Sondaı-aq memlekettik basqarý júıesin jetildirýge de nazar aýdaryldy. 18 zańǵa senatorlardyń ózderi bastamashy boldy. Depýtattar tek otyrys zalynda ǵana emes, syrtta da edáýir jumys atqardy. Máselen, óńirlerde turǵyndarmen 500-den astam kezdesý ótti.
«Úkimetke 140 saýal joldaǵan senatorlar Memleket basshysy alǵa qoıǵan maqsat-mindetterdi oryndaýǵa barynsha atsalysty. Sessııa barysynda azamattardyń ál-aýqatyn arttyrýǵa arnalǵan keshendi is-sharalar men qoǵamdyq saıası bastamalardy zańnamalyq turǵydan qamtamasyz etýge basa mán berildi. Qoǵamdaǵy áleýmettik teńsizdikti joıýǵa, erekshe qajettiligi bar azamattardy jan-jaqty qoldaýǵa arnalǵan normalar da qabyldandy. Osyǵan oraı senatorlar Memleket basshysynyń tapsyrmalaryn oryndaý maqsatymen zańǵa bastamashylyq etý quqyǵyn keńinen paıdalandy. Birinshi sessııada Senat depýtattary 7 zańǵa bastamashy bolsa, bul sessııa boıynsha 18 zańǵa bastamashyldyq jasady»,— dedi ol.
