Elimizdegi kredıttiń eń joǵary mólsherlemesin qaıta qaraý usynysy tastaldy. Ekonomıst Marat Ábdirahmanov qazirgi tańdaǵy 56% stavkany múldem tıimsiz dep atady, dep habarlaıdy “Adyrna” ulttyq portaly.
Marat Ábdirahmanov Azamattyq kodeks týraly zań boıynsha nesıeleýdiń shekti mólsherlemesi ekonomıkalyq jolmen ári Dúnıejúzilik Banktiń normatıvterine sáıkes eseptelýge tıis ekenin málimdedi.
"Bul stavkanyń mólsheri Qazaqstan ekonomıkasynyń jalpy rentabeldiligine baılanysty jáne odan joǵary bola almaıdy. Al bul kórsetkish 2021 jyly shamamen 20%-ti qurady. Máseleni sheshý úshin Azamattyq kodekstiń tıimsiz kelisimder boıynsha barlyq mindettemeni alyp tastaý týraly normasyn qalpyna keltirý qajet", – dedi sarapshy.
Ekonomıst buryn 1999 jylǵa deıin qoldanysta bolǵan Azamattyq kodekstiń osy normasyn qalpyna keltirgen jaǵdaıda, 3 mıllıon adamnyń kredıti sot arqyly esepten shyǵarylatynyn tilge tıek etti.
"Ol esh nársege negizdelmegen jáne damyǵan elderdiń basym kópshiligine qaraǵanda áldeqaıda joǵary. Bul úkimettiń jáne osy jyldar ishinde ekonomıkalyq saıasatpen, qarjy naryǵyn retteýmen aınalysqandardyń qateligi. 56% – bul tonaý", - dedi ol.
Halyq partııasy tóraǵasynyń orynbasary eń joǵary stavkany "qaıta qarjylandyrý stavkasynan eki ese mólsherde belgileý kerek"dep atap ótti.
“Adyrna” ulttyq portaly
