25 maýsymda Sankt-Peterbýrgte Aleksandr Lýkashenko men Vladımır Pýtın kezdesti.
Lýkashenko Pýtınmen qorǵanys máselelerin talqylaý mańyzdylyǵyn atap ótti.
“Bizdi kórshilerimizdiń júrgizip otyrǵan saıasatynyń saldarynan týyndaǵan jaǵdaılar alańdatyp otyr. Aıtyp otyrǵanym Polsha men Lıtva elderi. Olar bizge qarsylyq tanytqysy keledi. Olar sizge de qyr kórsetkisi keledi. Máselen, Ýkraınadaǵy jaǵdaıdy alyp qaraıyq, sońǵy kezderi ol jaqta Polshadan kelgen jaldamaly jaýyngerler kóbeıip ketti. Mundaı saıasat ustanýdyń ne qajeti bar? Olardyń artynda áldekimderdiń turǵany belgili. Degenmen mundaı saıasat jıirkenishti, is-qımyldary agressıvti
Lıtvanyń áreketteri osyndaı. Sońǵy kezderi olardyń Reseıden Belarýs arqyly Kalınıngradqa tranzıttik tasymaldaýdy toqtatý, Kalınıngradty oqshaýlaý jospary týraly aqparat legi taralýda. Bul soǵys jarııalaýmen birdeı, qazirgi kezde mundaı dúnıelerge jol berýge bolmaıdy”, – deıdi Lýkashenko.
Sonymen qatar Belarýs basshysy AQSh pen NATO ushaqtarynyń oqý-jattyǵý sharalaryn júrgizýine alańdaýly ekenin jetkizdi.
"Bul bizdi úreılendiredi. Sondyqtan sizden osy jaǵdaılarǵa qarama-qaıshy jaýap qaıtarý máselesin qarastyrýdy suraımyn. Olar ıadrolyq zymyrandardy tasymaldaý boıynsha jattyǵý júrgizýde. Múmkin bolsa, bizge kem degende ıadrolyq qarýdy tasymaldaı alatyn ushaǵymyzdy beıimdeýge kómektesińiz. Árıne, erteń kúni ıadrolyq qarýdy jetkizemiz degim kelmeıdi, biraq biz saqadaı saı otyrýymyz qajet. "1941 jyly da bári jaqsy bolady, bári tynysh, eshkim shabýyl jasamaıdy" dep uıyqtap jatyp edik qoı.
Biraq sońynda eshnárse de daıyn emes bolyp shyqty. Sondyqtan bul bizdi oılandyratyn jaǵdaı. Bul suraqty aldyńyzda birinshi ret kóterip jatqan joqpyn. Sizdiń qorǵanys mınıstrliginde ne talqylaǵanyńyzdy bilemin. Endi jaǵdaıdyń qalaı órbıtinin estigim keledi. Bárine daıyn bolýymyz kerek degim keledi. Tipti Brestten Vladıvostokqa sozylǵan Otanymyzdy qorǵaý úshin aýyr qarý qoldanýǵa da ázir bolǵanymyz jón. Amerıkalyqtar qajet bolmasa, NATO-daǵy seriktesterin paıdalanyp, ne úshin daıyndyq júrgizip jatyr dep oılaısyz?” – dep qosty ol.
Pýtın Eýropadaǵy NATO-nyń 6 elinde amerıkalyqtardyń 200 taktıkalyq ıadrolyq qarýy jáne olardy qoldanýǵa arnalǵan 257 ushaǵy bar ekenin aıtty. Buǵan qosa ol Sý-25 ushaǵyn jabdyqtaýdy usynyp, Belarýs "Iskander-M" taktıkalyq zymyrandyq keshenderin ıe bolatynyn qosty.
"Ázirge NATO ushaqtarynyń Belarýs aspanynda júrgizip jatqan oqý-jattyǵý sharalaryna jaýap berý qajet emes. Belarýs armııasy Sý-25 ushaqtaryna ıe, qazir olardy qaıta jabdyqtap, ushqyshtar quramyn oqytýdy bastaýǵa bolady. Keliskenimizdeı, aldaǵy birneshe aıdyń ishinde Reseı Belarýs eline qarapaıym jáne ıadrolyq nusqadaǵy ballıstıkalyq jáne qanatty zymyrandardy da qoldana alatyn "Iskander-M" taktıkalyq zymyran júıelerin beremiz”, – dedi ol.
Buǵan qosa Reseı prezıdenti odaqtas elderdi qurý jaıly aıtty.
“Árıne, Odaqtas elderdi qurý týraly suraqtar kún tártibinde tur. Qazir jaýapty vedomstvolarmen bárin aıqyndap qoıdyq, endi olardy qalaı iske asyratynymyz jaıly oılanýymyz kerek”, – dedi Pýtın.
“Adyrna” ulttyq portaly
