Burynǵy prezıdenttiń inisi Bolat Nazarbaev «Almaty Steklo» zaýytynyń bas dırektory Ázim Abdýllaevty sotqa berdi, dep habarlaıdy "Adyrna" Ulysmedia.kz-ke siltep.
Kásipker buǵan deıin bıznesti reıderlik basyp alýdyń qurbany boldym dep málimdegen.
Áýezov aýdanynyń № 2 aýdandyq sotyna Bolat Nazarbaevtan ar-namysyn, qadir-qasıetin, iskerlik bedelin qorǵaý jáne moraldyq zııandy óteý týraly talap aryz túsken. «Sotqa deıingi hattamany daıyndaýmen tatýlastyrý rásimi» 27 maýsymǵa belgilengen.
Sáýirdiń basynda Abdýllaev 2006 jyly ashylǵan kásiporyn kirisin Bolat Nazarbaevpen bólisýge májbúr bolǵanyn aıtqan. Aıtýynsha, oǵan barlyq bıznes nysandarynan aı saıyn 300 myń dollar tólep turǵan. Osylaısha 15 jyl ishinde Abdýllaev Nursultan Nazarbaevtyń inisine 60 mıllıon dollarǵa jýyq aqsha aýdarǵan.
Zaýytta 400-ge jýyq adam jumys isteıdi. Ol jylyna orta eseppen 100 mıllıon túrli bótelkeler men konserviler shyǵarady. Zaýyt jylyna 5 mıllıon dollarǵa jýyq tabys ákeledi.
15 sáýirde Antıkor reıderlik basyp alý faktisi boıynsha tergeýdi bastaǵany belgili boldy.
Eske salaıyq, 20 maýsymda Bolat Nazarbaev pen onyń burynǵy áıeline qatysty qylmystyq is qozǵalǵany týraly aqparat paıda boldy. Istiń qozǵalýyna «KARÝAN» JShS quryltaıshysy Nursha Kákenovtiń reıderlik áreket týraly aryzy sebep bolǵany habarlandy. Bul týraly aqparatty Qarjy monıtorıngi agenttigi rastady.
