Qazaqstandyq jýrnalıst Sergeı Ponomarev Sheshenstan basshysy Ramzan Qadyrovtyń «Reseı Qazaqstandy qutqardy» degen úndeýine jaýap berdi, dep habarlaıdy «Adyrna» tilshisi.
«Ramzan Qadyrov Reseı Qazaqstandy «egemendiginen aıyrylyp qala jazdaǵan kezde» qutqarǵanyn aıtady. Vaınahtardyń úshinshi urpaǵynyń este saqtaý qabileti nashar ekenin bilmeppin. 1944 jyldyń aqpanynda Keńes úkimetiniń aıtýymen 500 myńǵa jýyq sheshen senimsiz jáne Gıtler jaǵyna ótýge daıyn halyq retinde Qazaqstanǵa azyq-túlik pen jyly kıimsiz vagondarmen jóneltildi. Qazaqtar sheshenderdi qaqaǵan aıazda ash-jalańash qatyp qalýdan saqtap, ózderiniń sońǵy nanymen bólisti. Sondaı-aq álsiregen sheshen balalaryn balshyq úılerine panalatty. Bul halyq Qazaqstan men qazaqtardy kádimgideı táńir tutty. Bireý Ramzan Ahmatulynyń jadyn jańartsa, ol kem degende bir mınýtqa uıalatyn shyǵar»,– dedi ol.
