Shara aıasynda oblys ákimi Janseıit Túımebaev bastaǵan óńir ardagerleri men zııaly qaýym ókilderi «Jeńis» saıabaǵyndaǵy Uly Otan soǵysynyń batyry, general Sabyr Raqymovtyń eskertkishine gúl shoqtaryn qoıdy. Jıynda aımaq basshysy Janseıit Qanseıituly jurtshylyqty jańa ǵımarattyń ashylýymen quttyqtady.
«Qoǵamdyq sanany jańǵyrtýǵa baǵyttalǵan Elbasy Nursultan Ábishuly Nazarbaevtyń «Rýhanı jańǵyrý» baǵdarlamasynyń usynylýy zaman talabyna saı mańyzdy sheshim boldy. Búgingi shara — erlikti dáripteýge, jastardyń boıyna otanshyldyq sezimdi sińirýge baǵyttalǵan. Batyrlarymyzdyń, ata-ájelerimizdiń Uly Otan soǵysy jyldaryndaǵy erlikteri men jeńisterin, tyldaǵy eńbekterin, aýǵan soǵysy ardagerleriniń erjúrektiligin nasıhattaıtyn bul mýzeıdiń mańyzy joǵary. Jastardy otanshyldyqqa tárıbeleýde bul ortalyqtyń da qosar úlesi mol», — dedi óńir basshysy.
«Erlik» mýzeıi 2012 jyly jeltoqsan aıynda ashylyp, 2013 jyly 19 shildede OQO tarıhı-ólketaný mýzeıiniń «Erlik» fılıaly retinde resimdelgen. Ǵımarattyń aýmaǵy buryn 209,6 sharshy metr bolsa, oblys ákimdiginiń qoldaýymen qosymsha qurylys júrgizilip, 285 sharshy metrge jańa ǵımarat salynyp otyr.
Jańadan ashylǵan eki qabatty ǵımaratta eki ekspozıııalyq zal, 50 oryndyq májilis zaly, eksponattardy saqtaıtyn jáne qyzmetkerler jumys isteıtin bólmeler bar. Bul murajaıda soǵys ardagerleriniń erlikterin dáripteýmen qatar zııaly qaýym ókilderimen kezdesýler jáne ózge de tarıhı-tanymdyq is-sharalar ótkiziletin bolady.
