Estonııa syrtqy ister mınıstrligi Pýtınniń Narva qalasy týraly sózi úshin juma kúni Reseıdiń osy eldegi elshisi Vladımır Lıpaevty shaqyryp aldy, dep habarlaıdy «Adyrna» ulttyq portaly.
"Azattyqtyń" habarlaýynsha, Reseı elshisimen áńgimelesken sheneýniktiń sózinshe, Estonııanyń Narva qalasy týraly Pýtın sózi Estonııany alańdatady.
"Halyqaralyq quqyq pen memlekettik egemendikti, aýmaqtyq tutastyq qurmetteýge tyrysý ornyna Reseı ımperıalıstik pıǵylyn tarıhty burmalaý arqyly kúsheıtip otyr. Mundaı tásildiń sońy jaqsylyqpen aıaqtalmaıdy, tipti Reseıdiń ózine de qaýipti",- deıdi Estonııa syrtqy ister mınıstrligi.
Estonııa Vladımır Pýtınniń Reseı ımperatory - I Petrdiń saıasaty týraly sózderine nazar aýdarǵan.
Beısenbi kúni jas kásipkerlermen kezdeskende Pýtın "I Petr Soltústiktegi soǵys jyldary Shveııa jerin tartyp alǵan joq, óz jerin qaıtaryp aldy. Sankt-Peterbýrg qalasynyń irgetasy qalanǵan jerde "slavıandar fın-ýgor halyqtarymen qatar ómir súrgen. Bul jer Reseı baqylaýynda bolǵan. Batys jaq ta solaı, mysaly Narva jaq" dep sóılegen.
"Bizdiń mańdaıymyzǵa da jerimizdi qaıtaryp alý jazylǵan sııaqty" – degen Pýtın qaı jerdi meńzegenin naqty aıtpaǵan.
«Adyrna» ulttyq portaly.
