«Balalar jyly» aıasynda elordadan 30 mınýttyq jerde «Qyzyljar» orman sharýashylyǵy aýmaǵynda «Sarjaılaý» etnolageri ashyldy, dep habarlaıdy «Adyrna» ulttyq portaly.
«Kúni keshegi dinı jat aǵym ókilderiniń áreketi aralasyp ketken «Qańtar qasireti» halqymyzdyń qabyrǵasyn qaıystyryp, elimizdi dúrliktirip, memleket tynyshtyǵyn buzdy. Qanshama jas qyrshynynan qıylyp, qansha ana zarlap qaldy. Búginde jastarymyzdyń arasynda ultynyń qundylyǵynan bezip, dini men dilinen ajyrap qalǵandar barshylyq. Bul rýhanı azǵyndyqtyń aýyr saldary qoǵamda din máselesine, dil máselesine «shammen qaraý» kerektigimizdi uqtyrdy. Urpaqtyń rýhanı-ónegelik tárbıesine jiti qaraý kerektigin kórsetti. Bul oqıǵa kókirek kózi oıaý, urpaǵynyń bolashaǵyn, eliniń erteńine alańdaıtyn jannyń barlyǵyna oı saldy. Bizdiń etnolagerdiń negizgi maqsaty - el erteńi bolar óskeleń urpaqtyń boıyna ulttyq qundylyqtardy sińirip, ult tarıhyna, ata jurtyna, ata tegine, ana tiline degen súıispenshiligin oıatyp, Otanyn sheksiz súıetin jáne qazaq bolǵanyn maqtanysh etetin azat oıly, táýelsiz urpaq tárbıelep, ulttyń sanasyn qalyptastyrý», - deıdi «Saryjaılaý» etnolageriniń negizin qalaýshylardyń biri – belgili qoǵam qaıratkeri, «Qara shańyraq» ulttyq tárbıe berý jobasynyń avtory, tarıhshy-etnolog Turar Sáttarqyzy.
Etnolagerdiń ashylý rásimine ult bolashaǵyna beı-jaı qaramaıtyn, keler urpaq aldynda jaýapkershilik júgin sezinetin birqatar el janashyrlary qatysty. Onyń ishinde QR Parlamenti Májilisiniń depýtaty, Halyqaralyq «Qazaq tili» qoǵamynyń prezıdenti Berik Ábdiǵalıuly, Elorda-Aqparat medıaholdıngi dırektorynyń orynbasary, Halyqaralyq «Qazaq tili» qoǵamynyń elordalyq fılıalynyń tóraǵasy Qanat Áýesbaı, belgili etnodızaıner, «Altyn orda» avtorlyq dızaın úıiniń negizin qalaýshy Yrza Tursynzada, qala ákimdiginiń ókilderi, Nur-Sultan qalasy ákimdiginiń janyndaǵy Áıelder isteri jáne otbasylyq-demografııalyq saıasat jónindegi komıssııa músheleri qatysty.
«Aldyńǵy jaqsy artqy jasqa tálim aıtpasa, el bolǵanyń qaısy?!», - dep Muhtar Áýezov taıǵa tańba basqandaı aıtyp ketkendeı, biz elimizdiń erteńgi tutqasy, ult bolashaǵy sanalatyn jas tolqyn aldyndaǵy zor jaýapkershilikti moınymyzǵa alyp, ata-babadan jalǵasyp, úzilmeı kele jatqan ulttyq salt-dástúrlerimizdi joǵaltpaı, berik ustanýdy alǵa qoıyp otyrmyz. Osy turǵyda urpaqtyń rýhanı tárbıesimen aınalysatyn ulttyq etnolagerimizdi ashtyq. Sebebi, memleket ultty qalyptastyrmaıdy, ult memleketti qalyptastyrady. Joǵaltqanymyzdy túgendep, janshylǵan ulttyq rýhymyzdy tiriltip, ótkenimiz ben óshkenimizdi qaıta jaǵyp, qazaqtyń ózine tán ulttyq bolmysyn qaıtarý – búgingi kúnniń eń ózekti máselesi bolyp qalmaq», - dep pikirin bildirdi «Saryjaılaý» etnolageriniń negizin qalaýshylardyń biri –Nur-Sultan qalasy QHA Analar keńesiniń tóraıymy, PhD psıhologııa doktory Altynaı Táńirbergenova.
«Adyrna» ulttyq portaly
