Elbasy Nūrsūltan Nazarbaev qazaqstandyqtardy Jeŋıs künımen qūttyqtady, dep habarlaidy «Adyrna» tılşısı.
«Qūrmettı qazaqstandyqtar! Barşaŋyzdy Ūly Jeŋıs künımen şyn jürekten qūttyqtaimyn! Būl qasterlı kün halqymyzdyŋ eren erlıgı men bırlıgınıŋ, qaharmandyǧynyŋ simvoly bolyp sanalady. Bız bügın soǧys qūrbandarynyŋ ruhyna taǧzym etıp, ardagerlerge qūrmet körsetemız. Olardyŋ maidandaǧy öjettıgı men tyldaǧy eŋbegı tuǧan elge degen qaltqysyz süiıspenşılıktıŋ jäne qaisarlyqtyŋ jarqyn ülgısı ekenı sözsız. Jiyrmasynşy ǧasyrdaǧy eŋ sūrapyl soǧystaǧy jeŋıs oŋailyqpen kelgen joq. Otan üşın ot keşkenderdıŋ erlıgın ūmytpau, ardagerlerge qamqorlyq körsetu – barşamyzdyŋ qasiettı boryşymyz. Batyr babalarymyzdyŋ qaharmandyǧy qazırgı tynyş zamanda da bızdıŋ boiymyzǧa jıger beredı. Ol auyzbırlık, patriottyq, qaisarlyq jäne Otanǧa degen mahabbat arqyly kez kelgen qiyndyqty jeŋıp, beibıt ärı baquatty ömırge qol jetkızuge bolady degen senımımızdı nyǧaita tüsedı. Ūly Jeŋıs künınde barşaŋyzǧa myqty densaulyq, baiandy baqyt pen jaqsylyq tıleimın! Aspanymyz ärdaiym aşyq bolsyn!»— delıngen habarlamada.
«Adyrna» ūlttyq portaly
