Qyzyljarda qalalyq ákimdik jetimderdi turǵyn úı kezeginen alyp tastaǵan. Al balalar úıiniń túlekteri onan habarsyz bolypty, dep habarlaıdy “Adyrna” ulttyq portaly “Astana” arnasyna silteme jasap.
Qazir oblys ortalyǵynda páter kezeginde 15 myńǵa jýyq adam tur. Onyń 1700-den astamy – ata-ana qamqorlyǵynsyz qalǵandar. Olardyń basym bóligi baspanaly bolý úshin ákimdiktiń tizimine 10 jyl buryn engen. Al byltyr kezektiń qalaı jyljyp jatqanyn bilý úshin ákimdikke barǵanda, tizimde joq ekenderin bilipti. Sheneýnikter bul keleńsizdikti aqparattyq bazanyń jańartylýymen túsindirdi.
“Tehnıkalyq aqaýlarǵa baılanysty bizde jetimder sanatynda turǵan azamattar kezeginen alyp tastalynǵan bolatyn. Biz tekserý júrgizý aıasynda osyndaı problema bar ekenin anyqtadyq. Qazirgi tańda naýryzdyń 24 kúni jańaǵy 49 azamattyń barlyǵy óz kezegine qaıta qoıyldy. Kezeginen jyljyǵan joq”, – deıdi Petropavl qalasynyń ákimdigi TÚKSh bóliminiń baspasóz hatshysy Ásem Aıtýlova.
Al prokýratýra organdary másele tek tehnıkalyq aqaýda emes dep esepteıdi. Quzyrly organ bul oqıǵaǵa tikeleı qatysy barlardy qazir anyqtap jatyr.
“Qala prokýratýrasy áleýmettik az qamtylǵan azamattardy kezekke qoıý boıynsha saraptama jumystaryn júrgizip, birqatar olqylyqty anyqtaǵan. Bul jerde tek tehnıkalyq aqaý ǵana emes, adamı faktor da bar. Kezekti bir bazadan ekinshisine kóshirý kezinde bireý qatelesip ketken bolar. Sondyqtan qazir biz tekseris jumystaryn qolǵa aldyq”, – deıdi Petropavl qalasy proekrorynyń orynbasary Qaısar Ábishov.
“Adyrna” ulttyq portaly
