Májilistiń 20 depýtatyna jazyqsyz jala japqan Kaırat Kýdaıbergen kimderdiń tapsyrmasyn oryndap otyr?!.
Atasynyń atyn da, óziniń atyn da qazaqsha jazýǵa saýaty jetpeıtin Kaırat Kýdaıbergen degen bireý, ózi Almaty qalalyq máslıhaty depýtaty eken, ózi “Amanat” partııasy múshesi nege Almatydaǵy qazaqtarǵa on sotyq jer berýge qarsy?
Al biz de qarymta suraqty osylaı qoıaıyq!
Qazaqtyń eń kóp baspanasyz júrgen jastary Almatyda.
Bul neme baspanasyz qazaqtarǵa on sotyq jer berý týraly zańnyń qalaı oryndalyp jatqany týraly Almaty qalasy ákimdiginen esep suraýdy máslıhatta nege kótermeıdi? Ol týraly osy ýaqytqa deıin nege oılamaıdy?!.
Múmkin, bul baıshykesh nemeniń odan da basqa “mańyzdy” sharýalardan qoly tımeı júrgen shyǵar.
Biraq keshe Qańtar qyrǵynynda qazaq jastary alańǵa teńdik surap shyǵyp, qyrylyp jatqanda, keıin tutas qamalyp, azaptalyp jatqanda, sol jastardy qorǵap bir aýyz sóz aıtqan joq máslıhatta. Biz astanadan Almatyǵa, Tarazǵa, Shymkentke, Taldyqorǵanǵa tb qalalarǵa keminde úsh ret kelip, túrmege kirip, árqaısysyn jeke qabyldap, jaǵdaılarymen tanysyp, aryzdaryn arasha surap, Bas prokýratýraǵa jiberdik. Aqpan aıynda el aralaǵanda sol túrmeden bosaǵan jigitterdiń ata-analary jylap turyp rahmet aıtty. Ol vıdeolar “Qazaq úni”ulttyq portalynda jarııalandy.
Al paraqshasynyń 75 paıyzy oryssha, vıdeosynda Qazaqstannnyń memlekettik tilin taptap, tek 100 paıyz Reseıdiń memlekettik tilinde qaqsap otyratyn, jınalystaryn tek orys tilinde júrgizetin Kaıratıktiń sol qańtar qyrǵynynda “Jabaıy Armannyń” janynda jarbańdap, aıaǵyna kebisin qoıyp, qolyna sý quıyp júrgeni ınternette tarap ketti… Keıin, bular ol jerden joq bolyp ketti de, qalǵan qazaq jastary arandap qaldy...
Men bulardyń bárin aıtar ma edim, aıtpas pa edim, jaqynda depýtat bloger, Kaırat haıpajor ótirikti shyndaı, shyndy qudaı urǵandaı etip, biraz ottapty.
Parlamentte biz, Májilistiń jetinshi shaqyrylymy depýtattary kelmeı jatyp, 2020 jyly býkmekkerlikti qoldaǵan zań qabyldanyp ketkenine parlamentke odan bir jyl keıin, 2021 jyly kelgen bizdi, áleýmettik-mádenı komıtettiń 20 depýtatyn kinálap shyǵypty…
1.Birinshiden, ol býkmekkerlik týraly zań bizge deıin burynǵy altynshy shaqyrylym kezindegi quramda 2020 jyly daıyndalǵan.
2.Ekinshiden, ol zań burynǵy quramda qabyldansa da, Kaıratık bosqa jala jaýyp jatqandaı, áleýmettik-mádenı komıtette emes, ekonomıkalyq komıtette qabyldanǵan.
Sonda muny, parlament saıtyn asha salsa da, gýglden qaraı salsa da mektep balasy da bile alatyn málimetti máslıhat depýtaty Kaırat myrzanyń bilmeýi , bul baryp turǵan saýatsyzdyq! Almatydaı saıası-mádenı ordanyń máslıhaty depýtatynyń atyna uıat jaýapsyzdyq!
Álde, bilip tursa da, laqtyrǵan tasyn ekonomıka komıtetinen áleýmettik-mádenı komıtetke bura salýy, aqshanyń ıisi shyqqan jerge aıaǵyn ańdap basatyn baıshykesh neme erteń tender-pender degendeı, ekonomıka komıtetine isi túsip qalatyn bolǵasyn, atyna kir keltirmeı, aınalyp ótken bolar… Sonda burynǵy bılikpen bite qaınasqan, burynǵy Nurotannyń, qazirgi “Amanattyń” depýtaty Kaıratık kimderdiń amanatyn, ıaǵnı tapsyrysyn oryndap otyr?!.
3.Úshinshiden, týra osy áleýmettik-mádenı komıtet depýtaty Elnur Beisenbaev býkmekkerlikke qarsy depýtattyq saýal jarııalady komıtet atynan.
4. Tórtinshiden, qazir áleýmettik-mádenı komıtette jastar týraly zań qaralyp jatyr. Sol bizge deıin qabyldanǵan býkmekkerlikti qoldaıtyn bapqa osy zań jobasynda tosqaýyl qoıylmaqshy. Iaǵnı, Kaırat Kýdaıbergen áleýmettik-mádenı komıteti depýtattaryna jala jabýdyń ornyna alǵys aıtyp, qoldaýy kerek emes pe, qıynnan qıystyryp jatqandary úshin, eger shynymen býkmekkerlikke qarsy bolsa?!. Joq, onyń bul aıbaraq tirligi ádettegideı kózboıaýshylyq pa?!.
Meıli ǵoı, soǵa bersin, sanasy soǵan jetse, saǵyzyn shaınaı bersin Kaırat myrza. Iá, shaınaı bersin, biraq halyqqa jalǵan aqparat beretindeı, adastyratyndaı, olardy qasıetti oraza kezinde jazyqsyz depýtattarǵa balaǵat aıtqyzyp, kúnáhar qylatyndaı, qarapaıym halyqtyń ne kinási bar?
Áıtpese, buǵan “Amanat” partııasy óz áriptesterin jazyqsyz jamanat etý úshin ǵana bergen joq qoı depýtattyq mandatty?!.
Aıtpaqshy, bul neme qaralaǵan Májilistegi áleýmettik-mádenı komıtetiniń 20 depýtatynyń 99 paıyzy, ıaǵnı, “Amanat” partııasynyń 19 depýtaty máslıhattaǵy partııalastary Kaırat Kýdaıbergendi jala japqany úshin máselesin maıshammen qaraýǵa partııa basshylaryna aryz jazýda… Sotqa berip te qalýy bek múmkin…
Qańtar qyrǵynynda eń kóp zardap shegý, eń kóp qurbandyq, eń kóp túrmege túsý Almaty qalasynda boldy. Sondyqtan da depýtat Kaırat Kýdaıbergen arandap, túrmege túsip, jazyqsyz azaptalǵan qazaq jastarynyń jaǵdaıyn aıtyp, máslıhatta kóterýge bolady ǵoı? Onyń ústine ol ózi taǵy QR Prezıdenti janyndaǵy Jastar saıasaty keńesiniń múshesi!?.
Al biz Jańaózen ereýili bastalǵannan bastap beıbit sherýshilerdi qoldap, jazyqsyz tutqyndalǵan jastarǵa arasha túsip, kúnde efırge shyǵyp, onshaqty maqala jazyp, parlamentte úsh ret kóterdik. Aqyrynda 14 naýryz kúni Bas prokýrordan bastap, búkil kúshtik qurylymdar, quzyretti organdar basshylaryn parlamentte esep bergizýge qol jetkizdik.
Biz Almatyǵa kelip, aqpannyń aıazynda sýyq túrmelerdi aralap, jazyqsyz tutqyndalǵandardy bosatyp, olardyń jylap júrgen ata-analaryn jubatyp júrgende, Kaırat myrza Dýbaıda kúnge qyzdyrynyp, shomylyp, jaǵajaıda shaǵylda shalqasynan jatyp, Dıkı Armannyń atqosshysy bolyp júrgendikten jaýap alýǵa shaqyrǵan quqyq qorǵaý oryndaryna áleýmettik jeliden sálem joldap jatady… Qalaı ómir súrýdi biledi, árıne!
Kaıratıktiń depýtattarǵa jala japqan feısbýk pen ınstagram postynyń astynda kózi ashyq el bizdi qoldap, kóptegen pikir jazýda. “El qamyn oılap, til zaryn aıtyp júrgen aqyn Qazybek Isanyń ondaı zańdy qoldaýy múmkin emes”, “Amanjol Áltaı keshe ǵana keldi emes pe, qalaı ondaı zańdy qabyldap úlgergen?”-degen, tb belsendi depýtattarymyzdy da arashalap jatqan halyqtyń pikirlerinde Kaıratbaıdyń sharýasy da joq! Tipti meniń onyń atyn belgilep turyp jazǵan: “Men býkmekerlikke baıaǵydan qarsymyn jáne “Qazaq úni” gazetinde buǵan qarsy maqala da jazǵanbyz! Sondyqtan, Kaırat Kýdaıbergen myrza, bundaı kúmándi tizim jasap, oǵan meniń, bizdiń atymyzdy qosýyńyz, birinshiden qyp-qyzyl jala, óıtkeni komıtet bundaı zań qabyldaǵan joq, ekinshiden eshqandaı etıkaǵa syımaıdy. Sondyqtan, meniń atymdy, ıaǵnı túgel tizimdi alyp tastaýyńyzdy talap etemin!
Bizge ondaı zań kelgen joq jáne eshkim menen ol týraly pikirimdi suraǵan emes."-degen jazbama da jyltyraǵan beti bir bylq etpedi-aý sabazdyń…
Bul nemeniń bizge, depýtattarǵa taǵatyn kinásin qarasańyz kúlkińiz keledi…
“Dál osy kisiler býkmekkerlerdiń, loto, bıngolardyń múddelerin qorǵap júr. Qalaı qoldap júr deseńiz, eń birinshiden osy suraq boıynsha nemquraılyǵymen”-dep soǵyp otyr bazardaǵy syǵan qatyndardaı sypyldap bal ashyp…
Al bundaı jala budan birer jyl buryn býkmekkerlerge qarsy maqala jazǵan bizdi kúıdirip jiberetin qaralaý ǵoı!
Osydan eki jyl buryn memleket qazynasynan trıllıon únemdegeni úshin túrmege túsken belgili qaıratker Islam Ábishevke jalaqor tergeýshiler men solaqaı sottardyń taqqan aıybyn oqyp, tańǵalyp edik. “Ol para alýǵa oqtaldy nemese para alýdy oılady”-degen bap ta bolady eken bizdiń Qylmys kodeksinde)))). Sondaı soraqy aıyptaýmen bes jyl arqalatyp jibergen edi… Keıin sol sotyń da, arandatýshy tergeýshiń de, jala jabýshy jandaıshaptar da ózderi qylmys ústinde ustalyp, sottalyp ketti. Endi biri shetelde qashyp júr… Al Islam aǵamyz mańdaıy jarqyrap eldiń ortasynda júr. Qudaı bar degen osy eken ǵoı!
Sol sekildi qudaı Qudaıbergenulyn sot ne tergeýshi qylmaǵanyna qudaıǵa shúkir. Áıtpese, bizden eki jyl buryn qabyldanyp ketken zańdy sol kezde biz depýtat bolmasaq ta, aıdalada júrip, “nemquraılylyqpen qoldaǵanymyz” úshin qanshama jyl arqalap keter edik))).
“Estimegen elde kóp” degen osy!))).
“Bireýge kúıe jaqsań, óz qolyń qap-qara bolady”-degendeı, bireý emes 20 parlament depýtatyna kúıe jaǵyp, qoldary ábden qap-qara bolǵan Kaırat Kýdaıbergen Qudaıdyń aldynda qalaı aqtalady eken erteń?..
Qudaıǵa qulshylyq jasaıtyn Qasıetti Ramazan aıynda bireýmen urysý túgili eshkimge ókpeleýge, renjýge bolmaıdy. Qaıta buryn renjisip júrgen adamdar bir-birimen keshirim surasyp, tatýlasýy tıis!
Biraq Kýdaıbergenniń qudaı bergen balasynyń qudaıda da sharýasy joq sııaqty…
“Qudaıdan qoryqpaǵannan qoryq” degendi taýyp aıtqan atam qazaq dana ǵoı…
Qasıetti Ramazan aıy bolǵandyqtan, men bizge jala japqan Kaırat Kýdaıbergenge degen renishimdi osymen keshtim…
Jalpy, oǵan bola renjýge de turmaıtyn bireý ekenine kózim jetti, paraqshasyn qarap otyryp…
Al “Amanattyqtar” óz áriptesterin ne isteıtinin, máslıhatta baılyqtyń býyna mastanyp, eshkimdi tyńdamaıtyn, oıyna ne kelse, sony istep, aýzyna ne kelse, oılanbaı sony aıta salatyn depýtattaryn ornyna qoıa ma, joq, “aqshań bolsa qaltańda- taltańdasań, taltańda” degendeı taırańdatyp qoıa bere me, ony ózderi bilsin. Bul olardyń ózderiniń partııalyq ishki sharýalary.
On eki aıdyń sultany - qasıetti Ramazan aıynda ustaǵan orazamyz qabyl bolsyn!
El aman, jurt tynysh bolsyn!
Qazybek ISA
Facebook paraqshasynan
