Sháken erkinirek, ójetteý bolyp ósti. Ony aýyl-aımaq jaqsy kórip, án saldyryp, taqpaq oqytady, ertegi aıtqyzady. Jumysqa beıimdiligi azdaý edi, tek qaıda oıyn-saýyq bolsa, sonda júretin.
Marqum sheshemiz "buzaýdy baǵyp kel, bolmasa tezek terip kele qoıyńdar" dese, Shákenniń ne ishi, ne basy aýyra qalady. Anamyz qattyraq aıtsa, "Serektastyń" basyna shyǵyp alyp, eki aıaqty salbyratyp jiberip jylaıdy da otyrady.
– Seniń jurtty qyljaq qylǵanda basyń aýyrmaıdy, al jumysqa kelgende bas ta, ish te aýyra qalatyny qalaı? – dep, apam renjıtin edi.
Sháken ekeýmiz teteles óstik. Sol sebepten bolar, kóp qaljyńdasa beretinbiz. Men sońǵy kezderde Shákenniń "óner qysyp jylap otyratyn tasy" dep joldastaryna "Serektasty" kórsetip kúldiretinmin.
Bizdiń ákemizdiń Aımanuly Abbas degen dáriger aǵasy bolǵan. Bul kisi Baıan aýdanynda asa qadirmendi adam edi. Sol kókemiz atyna minip alyp, aǵaıyndardy aralap "Halderiń qalaı, aýrý-syrqaýdan amansyńdar ma? Bala-shaǵa aman ba?" dep surap júretin.
Keıde "Serektastyń" basynda jylap otyrǵan Shákendi kórip, nege jylap otyrǵanyn suraǵanda apam qatty uıalyp, Shákenge qolyn sermep, "toqtat" degendeı ym jasaıdy. Sol kezde Abbas aǵa:
– Jámke, Jámke, oǵan uryspańyz, uryspańyz. Ol tegin jylap otyrǵan joq. Ony óner qysyp jylap otyr", – deıtin.
Sháken keıin artıst bolǵan soń aýyl úlkenderi "Apyr-aı, Abbas Shákendi jasynda "óner qysyp jylap otyr" deýshi edi, jaryqtyq bilip aıtqan eken ǵoı" dep tańdaılaryn qaǵatyn.
Áset AQMOLDA
