Byltyr küzde qamaudan bosap şyqqannan keiın ekı aidan soŋ köz jūmǧan dissident, aqyn Aron Atabektıŋ qyzy Alma Nūtyşeva äkesınıŋ denesınen tabylǧan "belgısız zatty" polisiianyŋ bermei otyrǧanyna şaǧymdandy, dep habarlaidy "Adyrna" saity "Azattyq" radiosyna sılteme jasap.
Aqyn qazasynyŋ sebebın tergegen Almatynyŋ Äuezov audandyq prokuraturasy 24 nauryzda Aron Atabek koronavirustan qaitys boldy degen tūjyrym jasap, qylmystyq ıstı toqtatqan. Bıraq Atabektıŋ qyzy äkesınıŋ denesınen tabylǧan kışkentai jūmbaq zattyŋ dissident ömırıne qalai äser etkenın bılgısı keledı.
— Men äkemnıŋ ädettegı bır aurudan ölgenıne senbeimın. Onyŋ denesıne saraptama jürgızılgende keibır jerı synǧany anyqtaldy. Keŋırdegı, qoly men aiaǧy qatty synǧan. Mūnyŋ bärı — qamauda otyrǧanda körgen azaby. Būl — bır. Ekınşıden, äkemnıŋ oŋ aiaǧynan belgısız plastik zat tabyldy. Onyŋ qalai tap bolǧany belgısız. Bıreuler engızdı me, belgısız. Äkem de būl turaly bılmegen. Nazar audaratyn bır närse, men täuelsız saraptama jürgızu üşın osy zatty maǧan beruın sūrap, polisiiaǧa aryz jazdym. Bıraq maǧan bergen joq. Endı Äuezov audandyq prokuraturasyn sotqa beremın. Aron Atabek qaza bolǧanymen, onyŋ ısı turaly äŋgıme älı bıtken joq. Jalǧasyp jatyr, – dedı Alma Nūtyşeva 15 säuırde Azattyq tılşısıne.Onyŋ sözıne qaraǧanda, "Şaŋyraq oqiǧasy" kezınde äkesınıŋ oŋ aiaǧyna oq tigen. Bıraq Aron Atabek oqiǧa turaly jazbasynda "oq tüsıp qalǧandyqtan özınıŋ jaralanǧanyn däleldei almaǧanyn" jazǧan.
"Būl sol oqtyŋ qaldyǧy ma, älde basqa ma, belgısız" deidı Alma Nūtyşeva.Ol zatqa täuelsız medisinalyq saraptama jürgızgısı keledı, bıraq qūqyq qorǧau organdarynyŋ äreketı soǧan kedergı bolyp otyrǧanyn aitady. "Jūmbaq zatty" beruden bas tartqan qūzyrly organdar sebebın de tüsındırmegen. Alma Nūtyşeva dissidenttıŋ ölımıne bailanysty ıstı qoǧam baqylaǧanyn qalaidy. Azattyq tılşısı äzırge qūzyrly organdardan jauap ala almady. "Şaŋyraq oqiǧasy" boiynşa sottalyp, 15 jyl türmede otyrǧan dissident, aqyn Aron Atabek byltyr qazanda qamaudan bosatylyp, ekı aidan keiın auruhanada köz jūmǧan. Atabek özıne taǧylǧan aiyppen kelıspei, jyldar boiy tolyq aqtaudy talap etken. Ol türmede şyqqannan keiın bır top belsendı men saiasatker Aron Atabektı qorǧau komitetın qūryp, halyqaralyq sotqa şaǧymdanyp, Aron Atabektıŋ ısın qaita qarauǧa qol jetkızuge küş salatynyn aitqan. Halyqaralyq qūqyq qorǧau ūiymdary men jergılıktı belsendıler onyŋ ölımıne bilıktı kınälap, tüsınıkteme berudı talap ettı. Halyqaralyq därejede tergeu jürgızu qajettıgın de alǧa tartty. Aron Atabek tırı tūrǧanda özınıŋ densaulyǧynyŋ naşarlauyna türmedegı qataŋ jaǧdai men azaptaular sebep bolǧanyn aitqan.
Ūqsas jaŋalyqtar
