Elimizdiń ár aımaǵynda qurylys jumystary bir sát toqtaǵan emes. Qaqaǵan qysta da, mı qaınatar ystyq jazda da qurylys jumystary damylsyz júrip jatady. Qurylys nysandarynda arnaıy tehnıkalar tynym tappastan jumys isteıdi. Elimizdegi qurylys kompanııalarynyń kóbi qurylys tehnıkalaryn jalǵa alý júıesi arqyly jumys jasaıdy. Bul álemde bar tájirıbe jáne qarjylyq múmkindigi az kompanııalar úshin tıimdi. Alaıda onyń óz táýekelderi bar desek te bolady. Oǵan maqala barysynda kózińiz jetedi.
2015 jyldyń 26 qarashasynda Qaraǵandy qalasynda basshysy Hasenov Dýlat bolyp tabylatyn «Kemenger» JShS men dırektory Djýbanysheva O.S bolyp tabylatyn «ISS Engineering» JShS arasynda nómiri 89/11-15 kelisimsharty jasaldy. Kelisimshart boıynsha «Kemenger» JShS-i óziniń qurylys tehnıkalaryn «ISS Engineering» JShS jalǵa berýge kelisti. Kelisimshartta aıyna 280 saǵatqa qurylys tehnıkasyn jalǵa alý kelisildi. Jalǵa bershi jalǵa alýshyǵa eki kúnniń ishinde qurylys tehnıkalaryn jetkizip berdi. Osylaısha taraptar qol alysyp, jumysty bastap ketti.
Degenmen kelisimshartta taıǵa tańba basqandaı kórsetilgen talaptar ókinishke oraı kóp uzamaı jalǵa alýshy tarapynan buzyla bastady. Qurylys tehnıkalaryn jalǵa alýshy «ISS Engineering» JShS kelisimshartta jazylǵan ýaqytta qarjyny birneshe márte ótemedi. 2016 jyldyń 13 qazanynda «Kemenger» JShS tarapynan «ISS Engineering» JShS tarapyna arnaıy hat jazyldy. Hatta «ISS Engineering» JShSniń 35115404 teńge bereshek ekeni aıtylady. Jalǵa berýshi tarap jalǵa alýshynyń qyrýar qaryzyna qaramastan óz tarapynan kelisimshartta bekitilgen mindettemelerdi oryndaýdy bir sátke bolsyn toqtatpaǵan, kerisinshe tek qarjyny óteý kerektigi jaıynda aýyzsha eskertý jasap kelgen. Sonymen qatar jalǵa alýshy qarjyny ýaqytyly tólemegendikten «Kemenger» JShS aqshalaı tapshylyq sezinip, óz qyzmetkerleriniń aılyǵyn berýde qınalǵandyǵyn aıtady. Hat sońynda qaryzdy on kúnniń ishinde ótinip, talap oryndalmaǵan jaǵdaıda sotqa júginýge májbúr bolatynyn eskertipti.
Alaıda aıtylǵan sóz sol jerde qalǵan syńaıly. Sebebi 2017 jyldyń 9- aqpanynda «Kemenger» JShS tarapynan «ISS Engineering» JShS-ne qaryzdy óteý kerektigi jaıly eskertpe hat kelip tústi. Onda qaryzdyń kólemi 34998737 teńgeni quraıtyny, hatty alǵannan keıin 10 kún ishinde tólemdi jasaý mindetti ekeni jazylǵan. Alaıda «ISS Engineering» JShS bul hatqa múlde jaýap bermegen, sol sebepti de 2017 jyldyń 19 sáýirinde kompanııaǵa kezekti hat jiberildi. Onda dereý arada qarjyny tóleýdi surap, hatqa jaýap berýdi talap etken bolatyn.
«Kemenger» JShS-ne 2017 jyldyń 21-qyrkúıeginde «ISS Engineering» JShS-nen jaýap hat kelip tústi. Onda Qaraǵandy oblysynyń arnaıy ekonomıkalyq soty 2017 jyldyń 24-tamyzynda «ISS Engineering» JShS qarjy tóleýge qabiletsiz dep sheshim shyǵarǵany jazylǵan. Osylaısha jalǵa alýshy jalǵa berýshiden buǵattalǵan esepshottardy ashýdy surapty. Esepshottarǵa qarjy túsip, onyń 30 paıyzyn jalǵa berýshi aldyndaǵy qaryzyn óteý maqsatynda aýdaryp otyratynyn jazǵan. Alaıda qarjy túsý úshin ýaqyt kerektigin de aıta ketipti. Osylaısha qarjy tóleýdi retteý týraly kelisimge qol qoıýdy suraǵan.
2017 jyldyń 2-qazanynda «Kemenger» JShS jaýap hat jazyp, «ISS Engineering» JShS tarapynan birneshe aldaý faktileri bolǵanyn keltire ketedi. Iaǵnı ekonomıkalyq sotqa júginip, óziniń qarjy tóleý qabiletiniń joqtyǵyn jasatý boıynsha proess bolatyndyǵy jaıly aqparattandyrý hatyn jazbaǵan. Sonymen qatar óziniń áreketteri arqyly «Kemenger» JShSny bankrottyq jaǵdaıǵa ákeletindigin eskertip, qarjy tóleýdi retteý týraly kelisimge qol qoımaıtynyn naqty aıtady.
Col jyldyń 24-qazanynda «ISS Engineering» JShS taǵy bir hat jazyp, kelisimge kelýdi suraıdy. Sol arqyly bankrot bolýdan kompanııany saqtap, jalǵa berýshi aldyndaǵy qaryzyn óteýge múmkindik berýdi ótinipti. Sondaı-aq, 27-qazanda ótetin talqylaýǵa qatysyp, máseleni eki kompanııa birlese otyryp sheshýdi suraǵan.
Artynsha «ISS Engineering» JShS qarjyny óteýdiń ornyna birneshe márte ekonomıkalyq sot arqyly jalǵa berýshimen otyrys ótkizip, jańa kelisim jasaýǵa usynystar jasaǵan.
2021 jyldyń 20-mamyrynda, «Kemenger» JShS hat jazyp, 33498206 teńge qaryzdy óteýdi suraıdy. Buǵan deıin jalǵa alýshy tarap bir márte ǵana qaryzyn ótegen, ıaǵnı bastapqyda jazǵan qaryzymyzdyń 1500501 teńgesin ǵana aýdarǵan. Bir márte. Artynsha qaıta qarjy aýdarýdy doǵarǵan.
Atalmysh hatqa qaryz tarap, ıaǵnı «ISS Engineering» JShS Qaraǵandy oblysynyń arnaıy ekonomıkalyq sotynyń sheshimi boıynsha 5 jylǵa «Ońaltý jáne bankrottyq týraly» zańynyń aıasynda arnaıy sheshim shyǵaryp, qarjylyq máselesin retteýge kómektesetin sheshim shyqqanyn aıtady. Onyń ishinde 2018-2023 jyldar aralyǵynda qarjylyq jaǵdaıyn rettestirýge qatysty múmkindik berilgen. Sondyqtan qaryz tarap qaryzdyń qalǵan bóligin qarjylyq múmkindigine baılanysty 2023 jylǵa deıin tólep bitiremiz degen jaýapty beripti.
Bul kompanııaǵa beıresmı derekkózder boıynsha Áset Isekeshevtiń týysy Erlan Isekeshevtiń de qatysy bolýy múmkin deıdi. Mysaly Erlan Isekeshev «ISS Corporation» kópsalaly kompanııasynyń dırektorlar keńesiniń tóraǵasy. Ol Qaraǵandy oblysy ákiminiń orynbasary qyzmetin de atqarǵan. Uzaq jyldar boıy túrli basqarýshylar qyzmetinde bolǵan. Mysaly «ISS Corporation» kompanııasynyń dırektorlar keńesiniń basshysy, «Samuryq Energo» AQ dırektorlar keńesiniń múshesi, «Falah Partners» ınvestıııalyq qorynyń múshesi (2009-2011 gg.), «KazynaCapitalManagement» AQ kompanııa basshysynyń keńesshisi, Qaraǵandy oblysy ákiminiń orynbasary, «Qaraǵandy Jylý» JShS bas dırektory «Qaraǵandy Jaryq» bas dırektory qyzmetterin atqarǵan. Osynsha kóp laýazym atqarǵan Erlan Isekeshevtiń de bul kompanııaǵa qatysy bolýy múmkin degen joramaldy joqqa shyǵarýǵa bolmas.
Bul ne sumdyq? Kelisimshartty birneshe márte buzyp, artynsha arnaıy sot arqyly sheshim shyǵartyp, 2015 jyly jasalǵan kelisimdi sozbaqtatyp saǵyzsha sozyp, jalǵa berýshi kompanııany qarjylyq turǵydan ábden tıtyqtatyp, keıin «qarjymyz bolǵanda tóleımiz ǵoı» degen syńaıdaǵy jaýap qaıtarǵan kompanııanyń áreketin qalaısha aqtap alýǵa bolady?!
"Adyrna" ulttyq portaly
