Oblystyq Muqaǵalı Maqataev oqýlary máresine jetti

2699
Adyrna.kz Telegram

Muzbalaq aqynnyń shyǵarmashylyǵyn oqýshylar arasynda keńinen nasıhattaýǵa arnalǵan baıqaý kezekti ret oblys deńgeıinde ótkizildi.

Qazaqtyń qara óleńin shekpen jaýyp ózine qaıtarǵan aqynnyń oqýlarynyń ótýine Almaty oblysy bilim basqarmasy tárbıe jumysy jáne qosymsha bilim berý bóliminiń jáne «Jetisý daryny» oblystyq daryndy balar men talantty jastardy anyqtaý jáne qoldaý oqý-ádistemelik ortalyǵy muryndyq boldy. Muqaǵalı Maqataevtyń 91 jyldyǵynyń aıasynda jalaýy jelbiregen ádebı dodaǵa oblystyń ár aımaǵynan 63 oqýshy qatysty.

Poezııany Muqaǵalısha súıetin daryndylar úsh atalym boıynsha baq synady.

Qatysýshylar «Aıtyp ótken aqynda arman bar ma?» atty baǵytta Muqǵalı Maqataevtyń óleńderin jatqa oqysa, «Jyr estafetasy» atalymynda «Aqqýlar uıyqtaǵanda», «Altaı-Atyraý», «Raıymbek-Raıymbek» poemalaryn jatqa aıtty. Al «Kókiregimde jyr sáýlesi mazdaıdy...» baǵytynda oqýshy óz shyǵarmashylyǵynan 3-5 shýmaqtan turatyn óleńin qazylar alqasynyń tańdaýy boıynsha oqydy.

Qazylar alqasy qatysýshylardyń tiliniń tazalyǵy, sahna mádenıeti, múdirmeı jatqa aıtýyna, kórkem oqýyna asa mán berdi.

Jarys barysynda ár oqýshynyń óner kórsetýinen keıin ádil qazylar upaılardy kórsetip otyrdy. Baǵalaýdaǵy shekti ball-10 upaı boldy.

« Jyldaǵy dástúr boıynsha Muqaǵalı oqýlary ótti. Ár baǵytqa 1 oqýshy, aýdan-qala boıynsha barlyǵy 3 úmitker usynylady. Búgin muzbalaq aqynnyń shyǵarmalaryna sýsyndap ósken jastar poezııa báıgesinde baq synady. Ózderińiz bilesizder pandemııa kezinde barlyq jarystar onlaın formatta uıymdastyryldy. Araǵa eki jyl salyp úlken baıqaýda bas qostyq. Osy ýaqyt aralyǵynda ustazdar men saıysqa qatysýshylardyń daıyndyqta birshama aqsańdaǵandaryn baıqadyq aldaǵy tańda bul kemshiliktermen jumys jasaımyz»,-dedi Almaty oblysy bilim basqarmasynyń bas mamany, qazylar alqasynyń múshesi Rýslan Arslanov.

5 saǵatqa sozylǵan oblystyq baıqaýda kil myqtynyń ishinen, shyn júırik sýyrylyp shyqty. Ár bir oqýshy qarym-qabileti men daıyndyq deńgeıine qaraı júldeli oryndardan kórindi.

Saıys qorytyndysy boıynsha, «Aıtyp ótken aqynda arman bar ma?» atalymyndy Uıǵyr aýdanynan kelgen Móldir Ermuqanova, «Jyr estafetasy» baǵytynda Talǵar aýdanynyń namysyn qorǵaǵan Madııar Erqanat, «Kókiregimde jyr sáýlesi mazdaıdy...» kezeńinde Eńbekshiqazaq aýdanynyń oqýshysy Erbol Medetbekuly júldeli 1 oryndy qanjyǵalaryna baılady.

Jarysta qatarynan oq boıy oza shaýyp, respýblıkaǵa joldama alǵandardyń qýanyshynda shek joq. Solardyń biri-Madııar Erqanat.

« Men «Jyr estafetasyna» qatystym. Jarysqa daıyndyq barysy qyzý ótti. Oblystyq Muqaǵalı oqýlary bolǵandyqtan básekede myqty bolary anyq.

Degenmen, ózimniń daıyndyǵyma sendim. Alǵashqy aınalymnan júldeger atanatynymdy sezdim»,-deıdi Oblystyq Muqaǵalı Maqataev oqýlarynyń 1 oryn ıegeri.

Ár baǵyttaǵy júldegerler sanyna keler bolsaq, 2 oryn-ekeý, 3 oryn-úsheý boldy. Osylaısha, poezııany janyna serik etkender laıyqty tuǵyrynan tabyldy.

Pikirler