Almatylyq sánqoılar arzan brendtik kıimderden qaǵyldy. Lýı Vıýton, Shanel jáne Erme syndy attary álemge tanymal saýda markalarynyń bazarlardy satylyp jatqan kóshirmeleri tárkilendi.
Osy markalarǵa ıelik etetin franııalyq kompanııanyń aryzy boıynsha saýda oryndaryn tekserýge shyqqan Ádilet basqarmasyndaǵylar nebári 46 sómkeni saýdadan aldyrtyp tastady. Bul týraly KTK habarlady.
Álemge tanymal taýarlardyń kóshirmeleri bazar men saýda ortalyqtarynda samsap tur. Olardy túpnusqadan ajyratý qıyn. Alaıda, jasandy taýarlardy jappaı tárkilep, kózin joıýǵa quzyrly organdar qaýqarsyz. Sebebi, tekseris júrgizý úshin brend ókilderi shaǵym túsirý kerek.
Franııadan jetken aryzdardyń biri boıynsha búgin ádilet departamenti áıgili Baraholka bazaryndaǵy dúkenderdiń birine bas suqty. Tekseris barysynda kásipkerden jalpy sommasy 215 myń tg bolatyn úsh tanymal taýar tańbasy beınelengen 46 sómke tárkilendi. Túpnusqasynyń bir danasy myńdaǵan dollardan asatyny anyq. Alaıda, barlyq taýarynan qaǵylǵan saýdager «nege tek meniń dúkenimdi tekserip jatyr» dep ań-tań. Aıtýynsha, naǵyz brendtik zatty bazardan izdeý aqymaqtyq.
«Barlyq bazardan maǵan ǵana keldi. Endi zańdy bolǵan soń qarsylyq bildirmeımiz. Men kelgen adamǵa orıgınal emes dep eskertem. Arzan baǵada satamyn»,-dedi kásipker Mereıgúl Jumahan.
2017 jyldyń ózinde 3 mıllıonnan astam jalǵan ónim tárkilenipti. Degenmen, Gýchı, Dolche Gabana, Shanel, Erme jáne ózge álemdik brendterdiń atyn jamylyp tigilgen kıimder men turmystyq zattardy saýdagerler kórshi elderden tasymaldaıdy. Keıin qoljetimdi baǵaǵa satady.
«Tanymal markalardyń belgisimen taýar yǵarý úshin sol kompanııadan ruqsat qaǵazyn alý kerek. Bul tártipke baǵynbaǵan shaǵyn jáne orta bıznes ókilderi 40,iri kásipkerler 50 aılyq eseptik kórsetkish mólsherinde aıyppul tóleıdi. Barlyq quzyrly organdar birigip, bul máseleni sheshý kerek.Sebebi, olar elimizdiń taýar aınalymyna zııan keltiredi»,-deıdi Almaty qalasy ádilet departamentiniń bólim basshysy Baqytjan Qulantaev.
Bılik ókilderi syrttan keletin jalǵan ónimdi baqylaýǵa qaýqarsyz ekenderin jasyrmady. Jyl basynan beri aryz-shaǵym boıynsha jumys istegen olar bazarlardy tekserýge shamalary jetip, eki kásipkerge 500 myń kóleminde aıyppul salǵan.
____________________________________________________________________________________________________________
ktk.kz
