"Astana" universitetıne tüsu üşın IELTS sertifikatyn "satyp alǧan" studentter oqudan şyǧaryldy. Bılım jäne ǧylym ministrlıgı jürgızgen tekserısterdıŋ nätijesınde bazada tırkelmegen 117 sertifikattyŋ bar ekenı anyqtaldy , - dep habarlaidy "Habar-24" .
Telearnanyŋ mälımetınşe, byltyr küzde emtihandy öz küşımen tapsyrǧandar aryzdanyp, būl ıs boiynşa tekserıs jürgızılgen edı. Sonyŋ nätijesınde aǧylşyn tılı emtihany boiynşa 117 tırkelmegen sertifikat anyqtalǧan.
"Bılım jäne ǧylym ministrlıgınıŋ komissiiasy ekı ret tekserıs jürgızdı. Basynda bız 33 balany şyǧardyq. Jaqynda taǧy 84 student oqudan şettetıldı. Endı būl azamattar olardyŋ oquyna jūmsalǧan qarjyny qaitaruy tiıs. Olardyŋ köbı grantta oqydy. Tek 9 adam ǧana oquyna özı töledı", - deidı "Astana medisinalyq universitetı" AQ rektorynyŋ orynbasary Frans Galiskii.
Būl oqiǧany tergeu qalalyq ışkı ıster departamentıne jüktelgen eken. Nätijesınde 117 qylmystyq ıs qozǧaldy. Onyŋ 30-y sotqa jıberılgen.
"385-baptyŋ 3-tarauy, iaǧni, jalǧan qūjatty paidalanu sanksiiasy boiynşa 300 ailyq eseptık körsetkış aiyppūl jazasy taǧaiyndalady", - deidı Saryarqa audandyq №2 sotynyŋ sudiasy Bolat Pazylov.
Sondai-aq, oqudan şyǧyp qalǧan studentterdıŋ orny qazır bos ekenı aitylady. Endı emtihandy öz küşımen tapsyrǧandar osy granttardy ielenuge ümıttı.
"Ökınışke qarai, bız būl tüiıtkıldı öz betımızben şeşe almaimyz. Ol üşın Bılım jäne ǧylym ministrlıgı bırqatar qūjatty retteu kerek. Sonyŋ negızınde bız aqşa tölep oqyp jatqandardy osy bos oryndarǧa auystyramyz", - dedı "Astana medisinalyq universitetı" AQ rektorynyŋ orynbasary Frans Galiskii.
Telearnanyŋ mälımetınşe, jalǧan sertifikat satyp alǧan studenttıŋ bärı oqudan küzde şyǧaryluy tiıs bolǧan. Bıraq sottyŋ būl şeşımı uaqtyly oryndalmaǧan. Mūndai jaǧdaida medisina mamandaryn daiarlaityn oqu ordasy lisenziiasynan aiyryluy da mümkın eken.
_____________________________________________________________________________________________________________________
tengrinews.kz
Ūqsas jaŋalyqtar
