Ulttyq qaýipsizdik komıteti memleketke opasyzdyq jasaý, bılikti kúshpen basyp alý jáne laýazymdyq mindetterin asyra paıdalaný kúdigi boıynsha Másimov pen basqa da adamdarǵa qatysty qylmystyq is boıynsha jańa derekter jarııalady, - dep habarlaıdy “Adyrna” ulttyq portaly Tengrinews.kz saıtyna silteme jasap.
Sonymen qatar, tergeý barysynda Másimov áreketterinde sybaılas jemqorlyq belgileri kóp anyqtalǵany habarlandy.
"Jyljymaıtyn múlikti zańsyz alý derekteri, qymbat syılyqtar, onyń ishinde mádenı qundylyqtar, otandyq bıznes-qoǵamdastyq ókilderinen jáne sheteldik sýbektilerden qomaqty qarajat alý deregi qujatqa tústi.
Atap aıtqanda, UQK tóraǵasy laýazymynda Másimovtyń jabyq kelisimsharttardyń biri boıynsha shet memleket ókilderinen 2 mıllıon AQSh dollary somasynda para alý deregine tergeý júrip jatyr", - delingen habarlamada.
Atalǵan qarajattyń Gonkongtan Qazaqstan Ulttyq bankine qaıtarylýy qamtamasyz etiletini aıtyldy.
Sondaı-aq, Másimov premer-mınıstr laýazymynda bolǵanda elordada bıznes-qurylymdardyń birinen quny 2,5 mıllıard teńgege jýyq elıtalyq qonaq úı men jer ýchaskesin alý deregi boıynsha tergeý bastaldy.
Másimov ustalǵannan keıin, 2022 jyldyń qańtarynda bul qonaq úıden 17,2 mıllıon AQSh dollary, sondaı-aq kóptegen sándi zattar - elıtalyq saǵattar, altyn quımalar, antıkvarıat jáne taǵy basqa zattar tárkilengeni habarlandy.
Odan bólek, bıznes-klass sanatyndaǵy 11 qymbat avtokólik tárkilendi.
Nur-Sultan qalasyndaǵy eki elıtalyq páterine, Almatydaǵy eki páterge jáne saraıǵa, sondaı-aq, ýchınsk-Býrabaı kýrorttyq aımaǵyndaǵy kóldiń jaǵasyndaǵy aýdany 1 gektar jer ýchaskesine tyıym salyndy.
Másimovpen jaqyn baılanystaǵy adamdardan 5,1 mıllıon dollar tárkilendi.
"Osymen bir mezgilde Másimov pen onyń aınalasyndaǵylar shetel bankterine zańsyz shyǵarǵan asa iri mólsherdegi aqshalaı qarajatty izdestirý, buǵattaý jáne Qazaqstanǵa qaıtarý boıynsha jumys uıymdastyryldy", - delingen habarlamada.
UQK málimetinshe, barlyq kórsetilgen derekter boıynsha qarqyndy jedel jedel-tergeý is-sharalary júrip jatyr.
