Zamanbek Nurqadilovtiń uly Qaırat Nurqadilov Nurseıit Jylqyshybaıdyń «Ýaqyt kórsetedi» baǵdarlamasyna suhbat berdi. Suhbat barysynda ákesiniń isin qaıta jańǵyrtatynyn jarııalady, dep habarlaıdy “Adyrna” ulttyq portaly.
Qaırat Nurqadilov shyndyqty aıtatyn ýaqyt kelgenin, aıtý paryzy ekenin alǵa tartty.
«Ákem saıasattyń qurbany boldy. Eki ret júreginen, bir ret mańdaıynan atyp óz-ózine qol jumsady degenge kelispeımin. Qaıtys bolǵanda departamenttegiler meni jábirlenýshi bolyp, barlyq saraptama qujattarǵa sen qol qoıasyń dedi. Bir juma ótkennen keıin palto kıgen uzyn boıly organdaǵy eki jigit keldi. Olar «óz-ózin óltirdi bolady, sýııd dep jazamyz sen soǵan kelisesiń» dedi.
Men kelispeımin desem, olar «ashanada ushyp júrgen shybynnan góri seni óltirý ońaı, sen bizge problema emessiń» dedi. Seniń balalaryń áli kishkentaı olardy erteń kim asyraıdy dep aıtty.
Sosyn olar oılanýǵa bir kún ruqsat berdi. Bir kúnnen keıin bólimshege baryp qujattaryna kelisemin dep qol qoıdym», dedi uly.
Qaırat Nurqadilov arada 17 jyl ótkennen soń, ákesiniń isin qaıta jańǵyrtyp, teksergisi keletinin aıtty.
“Adyrna” ulttyq portaly
