Túrkistan oblysynda dırektordyń orynbasarynan "ólerdeı qorqamyz" degen muǵalimder shý shyǵardy, dep habarlaıdy “Adyrna” ulttyq portaly KTK arnasyna silteme jasap.
Tipti jınalysta aıaǵy aýyr muǵalimdi uryp, túsik tastatypty-mys. Biraq taıaq jegenin jazyp ujym bolyp shaǵymdanǵanymen, Shardara aýdanynda oǵan tusaý joq kórinedi.
Shardara aýdanyndaǵy Kóksý aýylynda jalǵyz mektep bar. Muǵalimderdiń kópshiligi dırektordyń oqý isi jónindegi orynbasaryna shaǵymdanǵan. Raıgúl Musalıeva qyrkúıekte dırektor kabınetindegi jınalysta kóptiń kózinshe júkti áıeldi soqqyǵa jyqqan. Sodan "túsik tastadym" degen Sandýǵash Jaqypova bolǵan oqıǵany kabınette kórsetip berdi.
“Myna jerde otyrǵanmyn ıterip jiberdi, taptalyp qaldym, shashymnan julyp, basymnan urdy. Ol eki ortada bylapyt sózder aıtty. "Aýzyń ájethana, surqııa, betbaqsyń sen mektepti 3-ke bitirgensiń, jezókshesiń" degen áńgime aıtty”, – muǵalim Sandýǵash Jaqypova.
Ustasqan ustazdardy er muǵalimder ázer ajyratyp alǵan. Osydan keıin "ózińdi úıińmen qosa órteımin" dep doq kórsetipti. "Osyǵan deıin úndemedik" degen ujym aqyrynda dırektor orynbasaryna qarsylyq bildiripti. Sebebi, jumysqa týǵan-týystaryn tartqysh degen Raıgúl Musalıeva mektep isinen bastap, otbasymyzdaǵy tirlikke deıin aralasady ári qorqytady deıdi.
“Saǵat bólýge osy kisi aralasyp, barlyǵyn ózi sheshkisi keledi, aralaspaıtyn isi joq. Otbasymyzǵa da aralasady. Dál osy jaǵdaıda bizdiń qurbymyz bolǵandyqtan, kórshimiz bolǵandyqtan, "ol kisimen aralaspaısyńdar, aralassańdar, búkil jamandyqty kóretin bolasyń" dedi”, – deıdi muǵalim Bıbigúl Isaeva.
Al Raıgúl Musalıeva munyń bári "jala" deıdi. Alǵashynda "múldem tóbelespedim" degen dırektor orynbasary keıinnen "urǵanym ras, biraq túsik tastaýyna qatysym joq" deıdi. Ol týraly saraptamanyń qaǵazy da bar eken. "Ujymdaǵy bylyqty ashyq aıtatyn tik minezim úshin qoldan jasalyp jatqan jala" - deıdi.
“Meniń bul jerde mekteptegi sybaılas jemqorlyqty orynsyz áreketterdi aıtqanym úshin jaqpadym, áńgimeniń ashyǵy sol. Bul jerde, mysalǵa, meniń negizsiz ustaıtyn bir kúndik, eki kúndik degen qarjylar. Mekteptiń jóndeý jumysy, sodan keıin vakansııa joq, adam qabyldaıdy mektepke. Men sony aıtam”, – deıdi T.Aıbergenov atyndaǵy mektep-gımnazııa dırektorynyń orynbasary Raıgúl Musaǵalıeva.
Qazir mekteptegi 100-ge tarta muǵalim dırektor orynbasaryn qyzmetinen alý týraly oblystaǵy bilim basqarmasyna shaǵym daıyndap jatyr. Shardara bilim bólimi mektep muǵalimi basshysyna qatysty qorlaý deregimen sotqa bergenin, sondyqtan ázirge eshteńe aıta almaıtyn jetkizdi.
Ujymnyń pikirinshe judyryǵy jýan basshydan qutqaratyn sheneýnik Shardara kóleminde joq kórinedi. Sebebi, Sandýǵash Jaqypovadan bólek ózge muǵalimdi de urǵany úshin dırektor orynbasary 60 myńnan sál astam aıyppulmen qutylǵan. Raıgúl Musalıeva da óz kezeginde ujymyn "dırektormen birge teksersin" dep quzyrly oryndarǵa shaǵymdanbaq.
“Adyrna” ulttyq portaly
