Búgin ǵalym áıelderdiń merekesi. Bul kúnge oraı QR Bilim jáne ǵylym mınıstri Ashat Aımaǵambetov elimizdegi ǵylymda júrgen qyz-kelinshekterdi kásibı merekesimen quttyqtady, dep habarlaıdy “Adyrna” ulttyq portaly.
Aımaǵambetov elimizdegi ǵalym qyz-kelinshekterdi óz áleýmettik jelisindegi paraqshasynda quttyqtady. Mınıstrdiń aıtýynsha, bizdiń elimizde ǵylym salasynda eńbek etip júrgen 10 myńǵa jýyq áıel azamattary bar.
Olar:
714-i ǵylym doktory
2427 áıel – ǵylym kandıdaty
992-si PhD doktory
28-i beıindik doktorlar.
“Osynshama názik jandar ǵylym salasynda tynymsyz eńbek etip júr. Jyl saıyn ǵylymdaǵy áıelder sany artyp kele jatqanyna qýanyshtymyn”,-dedi QR Bilim jáne ǵylym mınıstri Ashat Aımaǵambetov
Bilim mınıstriniń málimdeýinshe, búginde elimizdegi jalpy ǵalymdar sanynyń 54%-y áıelderden turady eken.
Sondaı-aq Ashat Aımaǵambetov koronavırýs pandemııasymen kúres kezindegi ǵalym áıelderdiń eńbegin erekshe atap óte kele, Zakarıa Kúnsulý Daltonovnanyń basshylyǵymen Bıologııalyq qaýipsizdik máseleleri ǵylymı-zertteý ınstıtýtynda COVID-19-ǵa qarsy qazaqstandyq QazCovid-in (QazVac) vakınasy daıyndalǵanyn tilge tıek etti.
“Ǵylymdaǵy názik jandardy halyqaralyq merekemen quttyqtaımyn. Otandastarymyzdyń ómirin jaqsartý úshin jáne elimizdiń ǵylym salasyn damytýda atqaryp júrgen baǵa jetpes qyzmetterińiz úshin alǵys aıtamyn. Bıik belesterdi baǵyndyra berýlerińizge tilektespin”,-dedi Ashat Aımaǵambetov.
“Adyrna” ulttyq portaly
