Memleket basshysy Qasym-Jomart Kemeluly Toqaev «Biraz ýaqyttan keıin, múmkin jyl sońyna qaraı, «Nur Otan» partııasyna odan ári tóraǵalyq etýimniń oryndylyǵy týraly máselege qaıta oralamyz», – dedi
Bul durys baǵyttaǵy qadam degen oıdamyn. Prezıdenttiń bir partııanyń múshesi bolýy qazirgi tańda ózekti emes. Bizge «bıliktiń jobalary» dep halyq tarapynan synalmaıtyn, elektorattaryn ilestire alatyn partııalar qajet. Óıtkeni el azamattarynyń senimi qashanda mańyzdy. Mysaly, ózim bilim alǵan Túrkııada Ádilet jáne Damý partııasy, Ultshyldyq qozǵalys partııasy, Respýblıkalyq halyq partııasy jáne t.b. bar. Túrik aǵaıyndar bul partııalarǵa jańa ıdeıalar men bilikti kadrlardyń generatorlary retinde úmitpen qaraıdy. Eldiń qamy úshin jumys isteıtinderine senedi. Halyqtyń azamattyq belsendiligi de jaman emes. Al oppozıııalyq baǵyttaǵy Respýblıkalyq Halyq partııasynan Ekrem Imamoǵlynyń Ystambul qalasynyń ákimi bolyp otyrǵanyn eske salatyn bolsaq, ol jaqtaǵy saıası partııalar arasyndaǵy shynaıy básekelestiktiń bar ekenine kóz jetedi.
Jalpy, parlament tıimdi sheshimder qabyldaý úshin ártúrli kózqarastardyń, jan-jaqty taldaýlardyń alańy bolý kerek. Proporıonaldy saılaý júıesimen ǵana qalmaı, qoıylatyn talaptardy aıqyndap, majorıtarlyq saılaý júıesin de qalyptastyra bergen durys sııaqty. Yqpaldy parlamentti de kóretin kún týar.
2019 jyly Abai.kz aqparattyq portalynda «Aqyn-jazýshylar men ǵalymdar parlamentte otyrý kerek» degen maqalam jarııalanǵan edi. Bul jerde mindetti túrde tek aqyn-jazýshylar men ǵalymdar bolsyn degen sóz emes. Negizgi oı — parlamentke halyqtyń áleýmettik-ekonomıkalyq jaǵdaıyna jete qanyq, qazaqtyń tili men dilin biletin, eli men jerin súıetin azamattardyń barýy. Maqalanyń tolyq mátini tómendegideı:
QR Prezıdenti Qasym-Jomart Toqaev Ulttyq qoǵamdyq senim keńesin qurý týraly bastamany mamyr aıynyń basynda óziniń saılaýaldy baǵdarlamasyn tanystyrý barysynda jarııalady. Bılik pen halyq arasyndaǵy dıalogty damytý maqsatynda qurylǵan keleli keńestiń alǵashqy otyrysy 6 qyrkúıek kúni Prezıdenttiń tóraǵalyǵymen ótti. Jańa organnyń otyrysynda buqaranyń kókeıinde júrgen máseleler qozǵalyp, kúrmeýi kóp túıinniń sheshilý joldary qarastyryldy. Osy oraıda, elimiz úshin mańyzdy kezeńde enjar qalmaı, óz oıymdy aıta ketýdi jón kórdim.
San ǵasyrlar boıy kóshpeli qazaq qoǵamynda zań shyǵarýshylyq qyzmetti bıler atqarǵanyn jáne shynaıy halyqtyq úlgidegi dala parlamenti jumys istegenin tarıhtan bilemiz. Handyqtaǵy bıler keńesi memlekettiń saıası-quqyqtyq, áskerı-dıplomatııalyq, áleýmettik-ekonomıkalyq jaǵdaıyn tek ádettegi quqyqpen ǵana emes, eldiń rýhanı-mádenı salt-dástúrimen ushtastyra otyryp qamtamasyz etken. Kúltóbeniń basynda qabyldanǵan "Táýke hannyń Jeti jarǵysynda" aforızm, maqal-mátel, qanatty sózderdiń kórinis tabýy sonyń dáleli. Bıler "Qasym hannyń qasqa joly", "Esim hannyń eski joly", "Áz Táýkeniń Jeti jarǵysy" zańdar jınaǵyndaǵy negizgi qaǵıdalar men normalardy tolyq meńgerip qana qoımaı, el-jurtynyń ádet-ǵurpyn, shejiresin, tarıhyn, kemel pikirlerin sheshen tilmen jetkize alatyn dara jandar bolǵan. Bolashaqtyń jolyn babalar salǵan joldan izdep, búgingi tańda da ot aýyzdy oraq tildi aqyn-jazýshylar men til, ádebıet, tarıh salasyndaǵy ǵalymdardyń Parlamentke kóbirek barǵandary durys dep oılaımyn. Qazaqtyń tilin, ádebıetin, tarıhyn jete túsinetin tulǵalar bılik pen halyq arasyn jaqyndata túsedi degen senimdemin.
Túıitkildi máselelerdiń túıinin tarqatýǵa baǵyttalǵan Ulttyq qoǵamdyq keńeske halyq úlken úmit artyp otyrǵany ras. Buǵan deıin de kóptegen keńester men koalıııalar bolǵan. Alaıda, "Bul keńes burynǵy keńesten ózgerek" dep bilemin. El irgesi aman, bolashaǵymyz jarqyn bolsyn!
Qýanysh Jumabekuly
«Eýrazııa zertteýleri» mamandyǵy boıynsha PhD doktory, «Qazaqstannyń 100 jańa esimi» jobasynyń jeńimpazy
