Indýstrııa jáne ınfraqurylymdyq damý mınıstrligi jeńildetilgen avtonesıeleý baǵdarlamasyn qaıta iske qosýdyń birneshe nusqasyn qarastyryp jatyr, dep habarlaıdy «Adyrna» tilshisi.
Mınıstrliktiń baspasóz qyzmeti málimdegendeı, qazir baǵdarlamany qaıta iske qosýdyń birneshe nusqasy talqylanýda.
Nusqalardyń biri kóp balaly otbasylardy, quqyq qorǵaý organdary qyzmetkerlerin, dárigerler men muǵalimderdi qoldaýdyń kishi baǵdarlamasyn qosymsha engizý usynylýymen erekshelenedi.
Sondaı-aq, «Birinshi otbasylyq avtokólik» qosalqy baǵdarlamasyn qosý múmkindigi qarastyrylyp jatyr.
Aıta keteıik, jeńildetilgen avtonesıeleý baǵdarlamasy 2015 jyly iske qosyldy. Qarjylandyrýdyń jalpy lımıti 82 mlrd teńgeni quraıdy.
Baǵdarlama iske asyrylǵan sátten bastap revolverlik-qaıtarymdy qarajatty eskere otyryp, 159 mlrd teńgege 30 525 qaryz berildi. Qazirdiń ózinde 80 myńǵa jýyq adam otandyq avtokólikterdi satyp aldy.
«Adyrna» ulttyq portaly
