Iá, kórshiles qytaı eline sapar shekken saıyn sol eldegi ártúrli joldar men magıstraldardyń keremettigine eriksiz basymdy shaıqaımyn. Jerdiń asty da, beti de, ústi de taram-taram jolǵa toly. Sonymen qatar, qytaı qalalarynda tehnıkalyq jóndeý ortalyqtaryn da kóp kezdestirmeısiń. Sebebi, jol jaqsy bolsa, kólik ońaılyqpen buzyla ma?...
Mine, másele osynda bolsa kerek.
Olaı deıtinim, birde Sháýeshekten kele jatqan qytaılyq dosym Jarqyn esimdi azamatty shekaradan tosyp aldym. Ekeýmiz Semeıge jol tarttyq. «Jol azabyn tartqan biler» degen emes pe. Taskesken men Semeıdiń ortasyndaǵy shuryq tesik, oıqysh-oıqysh joldyń túrin kórgende álgi qytaılyq qonaǵym shoshyp ketti. Áńgimelesip kele jatyp:
-Beke, sizderde qyzyq osy, - dep bastady áńgimesin. – Ekonomıkanyń kúretamyry joldyń jaqsy bolýynda emes pe. Mynandaı joldyń sıqyn kórse sizderge qandaı ınvestor keledi? Meniń túsingenim, qytaıda jol salady, jol jóndeıdi. Al sizderde joldyń nasharlyǵynan tehnıkalyq jóndeý ortalyqtaryn kóptep salady da, kólik jóndeıdi eken,- degeni bar emes pe túıeden túskendeı etip. Estigende shynymen de oılanyp qaldym. Uıattan eki betim qyzaryp ketti.
Iá, aqıqatyn aıtpasa, sózdiń atasy óledi. Bul oqıǵa osydan on jyl buryn bolǵan edi. Sodan beri Almaty –Óskemen tas jolynyń qurylysy áli bitken joq. Eks Premer-mınıstr A.Mamın osydan eki jyl buryn Óskemenge kelgen saparynda atalmysh jol ýchaskesin 2020 jyly bitedi dep ýáde etken bolatyn. Sol ýáde qaıda? Sýdyń da suraýy bolýshy edi. Endi jańa úkimet halyqtyń muńy men muqtajyna qulaq asar degen úmittemiz.
