Astanalyq bir top turǵyn «muqtaj jandarǵa jeńildikpen páter áperemiz» dep kooperatıv qurǵan aıtysker aqyn Balǵynbek Imashevqa aldanyp qalǵandaryn aıtyp, vıdeo málimdeme jarııalady, dep habarlaıdy “Adyrna” ulttyq portaly Azattyq Rýhy saıtyna silteme jasap.
Tikeleı efırge shyqqan jábirlenýshi kelinshektiń biri aqynǵa «betinde saqaly, aýzynda Allasy bolǵan soń senip qaldym» dep otyr.
«2021 jyldyń tamyz aıynda ol kisi áleýmettik jelidegi paraqshasynda kooperatıv quryp, 300 muqtaj adamǵa úı alyp beremin, kezekke turyńdar» dedi. Bul qor ma, kooperatıv pa bilmeımiz, sebebi, qyzmetkerlerdiń ózi durys aqparat bergen emes. Kezekke tura berińizder, bir orynnyń quny 150 myń teńge turady dedi. Meniń ol kezde altynshy balama aıaǵym aýyr edi, júktilikke deıingi beriletin járdemaqy aqshasy túsip, birden kezek satyp aldym, qolymda túbirtegim bar», - dedi kópbalaly ana.
Jábirlenýshilerdiń eshqaısysy úı beretin uıymmen satý-satyp alý kelisimshartyn jasamaǵan.
«Balǵynbekpen WhatsApp arqyly kelistik. Kelisimshart daıyn bolǵan kezde bizdi keńselerine shaqyratynyn aıtty. Ol kisiniń aýzynda Allasy, betinde saqaly bolǵan soń sózderine sendim. Qarasha aıynda Balǵynbek myrza tikeleı efırge shyǵyp, qujattarynyń zańdy túrde shyqqanyn málim etti. Bul bir pıramıda sııaqty bolyp shyqty. Balǵynbek ol kezde bir bazar salyp jatqan. Meniń boljaýymsha, bizdiń aqshamyz sol jaqqa ketip qaldy», - dedi Aqsana esimdi kelinshek.
Baıqaǵanymyzdaı, jábirlenýshi kelinshek quqyq qorǵaýshysymen birge aqynnyń keńsesinen tikeleı efırge shyqqan. Sondaı-aq, keńsege quqyq qorǵaý organynyń qyzmetkerlerin shaqyrǵan. Aıta ketetini, kúni búginge deıin aqynǵa aldanǵan 300-ge jýyq adam bar kórinedi.
Atalǵan jaǵdaıǵa baılanysty ekinshi taraptyń pikirin bilý úshin Balǵynbek Imashevqa habarlasyp edik, aqyn telefonǵa da, WhatsApp habarlamasyna da jaýap bermedi.
“Adyrna” ulttyq portaly
