Ǵalym Jaılybaı. Qustyń úni

1947

Júregim aýyrady,
Naýryz týar,
sodan soń sáýir ári...
Burqaqtary basylsa bul jalǵannyń -
Syrqattary sanamnyń saýyǵady.
...Júregim aýyrady.

Aq tútekke qaramaı ańtarylyp,
Tarǵyl-tarǵyl tastaqpen tartady jurt.
Qaraǵannyń túbinde qarańdaǵan-
Arman qaldy qańtarda qańtarylyp.

Keı túnderde áppaq tús kóretin em,
Boztorǵaıy Máshhúrdiń kel,
Ótinem!
Qańtarylǵan Armandy qańtardaǵy –
Qutqaraıyq ekeýlep jel ótinen...

Qurban boldy toqty emes,
dúıim erkek,
Aıaǵy joq ne degen qıyn ertek?...
...Táńir me eken sap qoıǵan tálkegine
Shámil kókem tastapty kúıin órtep.

Balapandy bezdirseń uıasynan,
Ajyraıdy qalamym sııasynan.
...Sizdiń jańa kúıińiz
qandaı aǵa –
Bizdiń kúıdiń ataýy – «…Mı ashyǵan»

Túngi shahar,
telmirem shamdaryna,
Taýpyq bersin jaratqan,
qalǵanyma...
...Úmitterdi úzdikken úrkitpeshi –
Tuzaq tastaı kórmeshi, Armanyma.

Janym,
Seni janyma jıi erter em,
Aǵarǵanyń bar bolsa,
Quı, ertemen!
...Myna búlik qaı búlik
kim aıtady –
Myna zaman qaı zaman,
Kúı órtegen?...

Kim aıtady,
qaı búlik,
myna búlik?
Pende túgil ishinen tynady bult.
...Tańyp bershi,
jarasyn qulynymnyń –
Jaǵyp bershi,
janyna shyraq - úmit!

Dara jurtta bolady dana senim,
Ańyzyna syıǵyzǵan bar ásemin.
...Qustyń únin estidim
Tań aldynda –
Boztorǵaıyń sol shyǵar, Baba seniń!

Ǵalym JAILYBAI

Pikirler
Redakııa tańdaýy