QR Prezıdenti Qasym-Jomart Toqaev elimizdegi bilim berý salasy qaıta qaralatynyn málimdedi, dep habarlaıdy «Adyrna» tilshisi Zakon.kz-ke silteme jasap.
«Men bizdiń eldegi bilim salasyn qaıta formattan ótkizgim keledi. Biz ekonomıst, zańger men menedjer mamandaryn kóptep shyǵara bastadyq. Biraq bizge qazir bilimdi tehnıkalyq relske túsirý kerek»,– dedi ol.
Sonymen qatar, «Bolashaq» baǵdarlamasyna ózgeris kerek ekenin atap ótti.
«Biz jas azamattardy oqýǵa, onyń ishinde Reseıge attandyratyn bolamyz. Bálkim, eń birinshi kezekte Reseıge, tehnıkalyq joǵary oqý oryndaryna jiberý kerek shyǵar. Taıaýda ǵana men álemniń jetekshi elderiniń fılıaldaryn tehnıkalyq mamandyqtar boıynsha ashýdy tapsyrdym. Qazaqtar, jas qazaqtar eń aldymen tehnar bolýy kerek. Bul – meniń túpki baılamym»,– dedi Prezıdent.
Ol osy másele jóninde Úkimetke egjeı-tegjeıli pysyqtaýdy tapsyrdy. Sondaı-aq, memleket basshysy kásipkerlerge qarapaıym otbasynan shyqqan balalarǵa qoldaý kórsetýdi usyndy.
«Eger árbir qarjylyq ónerkásiptik top zamanaýı zaýyt ornatsa, aýyldardan, qala mańynan, iri qalalardan kelgen 1000 qarapaıym balany oqytsa, olarǵa jaqsy jáne adal aqsha tabýǵa múmkindik berse, bul áleýmettik turaqtylyqtyń mańyzdy kepili bolar edi. Bıznestiń bir jaýapkershiligi bolýy kerek. Bul úshin sizderde bári bar: kapıtal, tájirıbe, menedjerler toby, naryqtyń shynaıy kórinisi»,– dep túıindedi Toqaev.
«Adyrna» ulttyq portaly
