Almatylyq qaıyrymdy jandar qańtar qyrǵyny kezinde 8 adamnyń ómirin qutqaryp qalǵan. Bıbinur Sherálıeva esimdi kópbalaly ana kómekshilerimen birge keshegi alasapyranda qaskóılermen betpe-bet kelip, Prezıdent rezıdenııasyn qorǵaǵan sarbazdar men qarapaıym azamattardy aýrýhanaǵa jetkizýge atsalysypty. Eshteńeden taısalmaǵan eriktiler jaralylardy qutqarý úshin sodyrlardyń sózin sóıledik deıdi. Kópbalaly ana qandy kúngi jaǵa ustatarlyq jaıttardy Almaty.tv tilshilerine aıtyp berdi, dep habarlaıdy «Adyrna» ulttyq portaly.
«Jaralanǵan soldat bar, sony alyp shyǵýǵa kómektes dep bireý keldi. Júr dedim men. Biz jaıaý baryp alamyz dep oıladyq. Biraq kólikti órtep, jaryp jibere degen qaýippen alǵa jyljı bergendi jón kórdik. Árıne, qoryqtyq. Jaraly soldatty jerde jatqan polıııa qalqanyna salyp, kóterip aldyq. Ony mashınaǵa alyp kelgenimizben, ishine kirgize almadyq. Óıtkeni kishkentaı kólik bolǵandyqtan, ishine syıar emes. Birese qany aǵyp jatqan sarbazdy salamyz, birese qalqandy qoıamyz. Áıteýir amaldap jatyp, kólikke saldyq», – deıdi ol.
Osylaısha, eń alǵashqy adamdy №12 aýrýhanaǵa aparyp dárigerlerge tapsyrǵan. Al bul kezde kómekshileri Sulýshash Júsipova, Venera Turǵanova jáne Rýmılıa Hodjaeva esimdi eriktiler alańda qansyraǵan adamdarǵa alǵashqy medıınalyq kómek kórsetipti. Olar jaralanǵan 40 shaqty adam baryn kóripti.
«Áskerı kólik 300 km/saǵatpen júıtkigen shyǵar. Adamdardy basyp kete me dep qatty qoryqtyq. Óldik dep oıladyq. Sosyn ol ótip ketkennen keıin biz qaıtadan kólikpen ishke kirdik, ishte bir jas balalar bar dedi. Bireýiniń aıaǵy, bireýiniń buǵanasy jaralanǵan, qan aǵyp jatyr dedi. Qaıtsek te solardy súırelep, aýrýhanaǵa tasydyq. Sóıtip júrgende 8 jaralyny shyǵaryppyz», – dep eske alady Bıbinur Sherálıeva.
Qaıtýǵa árekettene bergende kózi zaqymdanǵan taǵy bir órimdeı jap-jas sarbazdy №5 klınıkalyq aýrýhanaǵa aparyp tastaǵan. Qandy qyrǵynda Bıbinur Sherálıeva qarýlanǵandardyń qalaı ózara tildeskenine kýá boldym deıdi.
«Eki jedel járdemdi basyp aldy da, artynan kólikti jaǵyp jiberdi. Sosyn bir jeńil kólik kelip bularǵa avtomat taratty. Olar bizge de kelip «sizderdiń mashınańyzben qarý alyp keleıik» dep usyndy. Biz «jaralylardy tasyp jatyrmyz, qazir qolymyz tımeıdi» dedik. «Joq, barmaımyz» dep aıtýǵa qoryqtyq», – deıdi Bıbinur Sherálıeva.
Kóbi sodyrlardyń aıdaýyna erip ketken jastar ári olar ne istep júrgenderin bilmegen edi dep eske aldy.
«Qazir bári ótkennen keıin «olar meni op-ońaı ata salatyn edi ǵoı» degen oılar keledi. Biraq ol kezde mende ondaı qorqynysh bolǵan joq. Óıtkeni olar ne isteý kerek ekenin ózderi de bilmeı júrdi. Qoldarynda qarý bolǵanymen, ne istep, kimdi atý kerek ekenin de bilmeıdi júrgendeı kórindi», – deıdi kópbalaly ana.
Basbuzarlardyń kúdigine ilikken olar sodyrlardy aldap áreket etýge týra kelgenin aıtady.
«Bizdi ne dep aıtady eken dep quıturqy suraqtar qoıyp túrli áreketterge bardy. «Jansa, jansyn» dedim. Óıtkeni men olardyń bizden kúdiktenip turǵanyn túsindim. «Jansa, kók tútin bolyp janyp ketsin» dedim ádeıi. Eger joq dep bildirip qoısaq, onda olar bizdi jaralylarǵa jibermeıtin edi. Olardyń sózin sóıledik. Jasyratyny joq. Óıtip sóılemeseń, seni jaralylarǵa jolatpaıdy», – deıdi B. Sherálıeva.
