Syr halqy 1 mamyr - Qazaqstan halqynyŋ bırlıgı künın erekşe yqylaspen qarsy aldy

Bügın syrboiylyqtar 1 mamyr – Qazaqstan halqynyŋ bırlıgı künın zor yqylaspen, sän-saltanatymen qarsy aldy. Ortalyq alaŋnan bastau alǧan dumandy ıs-şarada türlı ūlt ökılderınıŋ änı men biı, salty men dästürı qatar örbıp, myzǧymas bırlıktıŋ aiqyn körınısı sezıldı, dep jazady "Adyrna" ūlttyq portaly.  Ortalyq aumaǧy merekelık nyşandy sipattaityn atributtarmen ärlenıp, äue şary men jer şary bırlıktıŋ simvolyn aişyqtady. Merekede oblys äkımı Nūrlybek Nälıbaev Syr halqyn bırlık künımen qūttyqtap, aqjarma tılegın arnap, tūrǧyndardy täuelsızdık, tatulyq pen tūraqtylyq syndy baǧa jetpes qūndylyqtardy saqtauǧa şaqyrdy.

- Bırlıgı jarasqan eldıŋ tırlıgı de törge ozady. Bügıngı taŋda ūly maqsattardy ūlyqtap, dostyqqa qūşaǧyn aiqara aşqan Qazaqstan zamanaui älemde el Prezidentı Qasym-Jomart Kemelūlymen bırge damudyŋ jaŋa köşın bastady. Berekelı bırlıgımız ben tatu tırlıgımızdıŋ arqasynda serpındı ısterımız nätijelı bolyp, öŋırımız jaŋa deŋgeige köterılıp, elımızdıŋ ırgelı oblystarynyŋ qatarynan körınedı dep senemın. Jūdyryqtai jūmylǧan auyzbırşılıkpen ortaq müdde jolyndaǧy qiyndyqtardy qaiyspai köterıp, quanyşymyzdy bölısıp, aq nietımızdı, asyl qasietterımızdı tanytyp kelemız. Būl - tılı basqa bolsa da, tılegı bır, jüzı basqa bolsa da, jüregı bır jūrtymyzdyŋ ainymas bırlıgınıŋ şeksız dälelı. Bızdıŋ küşımız – bolattai berık bırlıkte!,-dedı oblys äkımı.

Ortalyq alaŋdaǧy negızgı şara konserttık baǧdarlamaǧa ūlasty. Dumandy merekede qazaq estradasynyŋ jarqyn jūldyzy Serık İbragimov Syr elıne merekelık än-şaşuyn alyp keldı. Sondai-aq, özge de tanymal öner ielerı körermen köŋıl-küiın köterıp, elge quanyş syilady. Mūnan keiın oblys äkımı elmen bırge türlı ūlt ökılderınıŋ qolöner būiymdary qoiylǧan körmenı aralap, balalar şyǧarmaşylyǧyn toptastyrǧan şaǧyn qoiylymdy körıp, türlı sporttyq oiyndardy tamaşalady.

"Adyrna" ūlttyq portaly